Eron va AQSH o‘rtasidagi 14 bandli memorandum loyihasi e’lon qilindi

 

Eronning Mehr axborot agentligi Eron va AQSH o‘rtasida muhokama qilinayotgan o‘zaro anglashuv memorandumi loyihasini e’lon qildi. 14 banddan iborat hujjatda mintaqadagi harbiy harakatlarni to‘xtatish, sanksiyalarni bekor qilish, Eronning muzlatilgan aktivlarini ozod etish hamda yadroviy masalalar bo‘yicha kelishuvga erishish kabi qator masalalar aks etgan.

 

Loyihaga ko‘ra, barcha jabhalarda urushni to‘liq va zudlik bilan to‘xtatish, AQSHning Eron suverenitetini hurmat qilishi va mamlakat ichki ishlariga aralashmaslik majburiyati belgilangan.

 

Hujjatda, shuningdek, 30 kun ichida dengiz blokadasini bekor qilish, Hormuz bo‘g‘ozi faoliyatini tiklash va AQSH qo‘shinlarini Eron bilan chegaradosh hududlardan olib chiqish taklif etilgan.

 

Memorandum loyihasida Eron nefti va neft-kimyo mahsulotlariga qo‘yilgan sanksiyalarni to‘xtatib turish, mamlakatning moliyaviy resurslaridan foydalanishiga imkon yaratish hamda Eronni tiklash bo‘yicha kamida 300 milliard dollarlik dastur ishlab chiqish masalalari ham o‘rin olgan.

 

Tomonlar 60 kun ichida yadroviy masalalar bo‘yicha yakuniy kelishuvga erishish yuzasidan muzokaralar o‘tkazishi, Eron esa Yadroviy qurolni tarqatmaslik to‘g‘risidagi shartnomaga sodiqligini yana bir bor tasdiqlashi va yadroviy qurol ishlab chiqarmaslik majburiyatini olishi nazarda tutilgan.

 

Bundan tashqari, muzokaralar davrida AQSH tomonidan yangi sanksiyalar joriy etmaslik va mintaqadagi qo‘shinlar sonini oshirmaslik taklif qilingan.

 

Eron Tashqi ishlar vazirligi mazkur matn dastlabki loyiha ekanini, u hali mamlakatning tegishli idoralari tomonidan ko‘rib chiqilishi va qayta ishlanishi lozimligini ma’lum qildi. AQSH tomoni esa hozircha bunday memorandum loyihasi muhokama qilinayotgani yuzasidan rasmiy izoh bermagan.