JCh-2026 ochilish kunida muxlis vafot etdi
Dastlabki ma’lumotlarga ko‘ra, muxlisning o‘limiga yurak xuruji sabab bo‘lgan bo‘lishi mumkin.
2026-yilgi futbol bo‘yicha Jahon chempionatining ochilish o‘yini oldidan Mexikodagi afsonaviy Azteca stadioni yaqinida muxlis vafot etdi.
Mahalliy OAV va ijtimoiy tarmoqlarda tarqalgan ma’lumotlarga ko‘ra, muxlis o‘zini yomon his qilganidan so‘ng voqea joyiga tibbiyot xodimlari jalb etilgan. Shifokorlar tomonidan yurak-o‘pka reanimatsiyasi muolajalari amalga oshirilgan bo‘lsa-da, uning hayotini saqlab qolishning imkoni bo‘lmagan.
Dastlabki ma’lumotlarda vafot etgan shaxsning yoshi va hodisa joyi bo‘yicha turli tafsilotlar keltirilmoqda. Ayrim manbalarda u 40 yoshli muxlis ekani, boshqa xabarlarda esa Germaniya fuqarosi bo‘lgan 81 yoshli erkak ekani ma'lum qilingan.
Ma’lum qilinishicha, muxlisning o‘limiga yurak xuruji sabab bo‘lgan bo‘lishi mumkin. Hozirda tegishli xizmatlar tomonidan holat yuzasidan o‘rganish ishlari olib borilmoqda.
Eslatib o‘tamiz, 2026-yilgi FIFA Jahon chempionati AQSh, Kanada va Meksikada o‘tkazilmoqda. Turnir tarixda ilk bor 48 ta terma jamoa ishtirokida tashkil etilmoqda.
