"Miyam o‘chib qoldi": Toshkentda bir nechta mashinaga urilgan Cobalt haydovchisi holatga izoh berdi

Toshkent shahrida ichki ishlar organlari xodimlarining to‘xtash haqidagi qonuniy talabiga bo‘ysunmay, bir qator qoidabuzarliklar sodir etgan Cobalt avtomobili xizmat qurolidan foydalanish orqali to‘xtatilgandi. Haydovchi hodisa yuzasidan izoh berdi.

 

Ma’lumotlarga ko‘ra, hodisa 11-iyun kuni soat 21:30 lar atrofida Yakkasaroy tumanidagi Shota Rustaveli ko‘chasida sodir bo‘lgan. Avtomobilni 1982-yilda tug‘ilgan, ruhiy-asab kasalliklari shifoxonasida ro‘yxatda turuvchi fuqaro boshqargan.

 

Qayd etilishicha, haydovchi ichki ishlar xodimlarining to‘xtash haqidagi qonuniy talablarini bajarmagan, qarama-qarshi yo‘nalishga chiqib ketgan, svetoforning taqiqlovchi ishoralariga amal qilmagan hamda harakat davomida bir nechta avtomobilga shikast yetkazgan.

 

IIBBga ko‘ra, uning harakatlari boshqa haydovchilar va piyodalarning hayoti hamda salomatligiga jiddiy xavf tug‘dirgan.

 

Haydovchini to‘xtatish maqsadida qo‘shimcha kuch va vositalar jalb qilingan. Biroq u bir necha bor avtomobildan tushish haqidagi talablarni ham bajarmagan va harakatni davom ettirishga uringan. Shundan so‘ng xizmat qurolidan foydalanilgan. 

 

Dastlab havoga ogohlantiruvchi o‘q uzilgan, keyinchalik esa avtomobilni to‘xtatish maqsadida uning g‘ildiragiga qarata o‘q uzilgan.

 

Toshkent shahar IIBB e’lon qilgan videoda haydovchining o‘zi ham voqeaga izoh berib, nima sababdan bunday harakat qilganini eslay olmayotganini aytgan.

 

“Bilmayman nima bo‘ldi. Eslay olmayman, to‘g‘risi. Miyam o‘chib qoldi, menimcha. Nega bunday qilganimni bilmayman”, — degan u.

 

IIBB ma’lumotiga ko‘ra, hodisadan so‘ng haydovchi shahar ruhiy-asab kasalliklari shifoxonasiga joylashtirilgan. Hozirda mazkur holat yuzasidan tergovga qadar tekshiruv harakatlari olib borilmoqda.