Tibbiyot muassasalarida “sirli mijoz” tizimi joriy etildi
Ushbu maxsus monitoring orqali ortiqcha dori yozish va tahlil tayinlash holatlari nazorat qilinadi.
Sog‘liqni saqlash vazirligi va Raqobat qo‘mitasi o‘rtasida imzolangan memorandumga muvofiq, ayrim tibbiyot muassasalarida ortiqcha tekshiruvlar tayinlash, zarur bo‘lmagan dori vositalari va biologik faol qo‘shimchalarni tavsiya etish holatlarini aniqlash va oldini olish choralari kuchaytirilmoqda.
Mazkur mexanizmga ko‘ra, Sog‘liqni saqlash vazirligining Komplayens-nazorat boshqarmasi hamda uning hududiy bo‘linmalari klinikalarda xizmat ko‘rsatish jarayonini tahlil qiladi va klinik protokollarga rioya etilishi bo‘yicha xulosalar beradi.
Vazirlar Mahkamasining 2025-yil 22-oktabrdagi 667-son qarori asosida tasdiqlangan nizomga muvofiq, dori vositalari va tibbiy xizmatlar bo‘yicha nazorat “sirli mijoz” usuli orqali amalga oshirilishi belgilangan.
Qayd etilishicha, bunday tadbirlar audio va video qayd etish vositalaridan yashirin foydalanish orqali amalga oshiriladi. Ayni paytda respublikadagi barcha tibbiyot tashkilotlarida “sirli mijoz” tadbirlariga start berilgani ma’lum qilindi.
