Farg‘onada talabaning o‘limiga sabab bo‘lgan mototsikl haydovchisiga hukm o‘qildi
Haydovchi qizil chiroqda to‘xtamasdan, yo‘lni kesib o‘tayotgan piyodani urib yuborgan.
Farg‘ona shahrida svetoforning taqiqlovchi ishorasiga amal qilmay piyodani urib yuborgan mototsikl haydovchisiga nisbatan sud hukmi e’lon qilindi. Bu haqda Yo‘l harakati xavfsizligi xizmati ma’lum qildi.
Ma’lumotlarga ko‘ra, yo‘l-transport hodisasi Farg‘ona shahri “Jo‘ydam” mahallasi hududidan o‘tuvchi Farg‘ona ko‘chasida soat 19:30 atrofida sodir bo‘lgan.
29 yoshli haydovchi tegishli toifadagi haydovchilik guvohnomasi, davlat raqam belgisi va texnik pasporti bo‘lmagan mototsiklni boshqarib ketayotganda svetoforning qizil chirog‘iga amal qilmay, yo‘lni kesib o‘tayotgan piyodani urib yuborgan.
Hodisa oqibatida piyoda olgan tan jarohatlaridan vafot etgan. Marhum Rishton tumanida tug‘ilgan bo‘lib, Farg‘ona shahridagi oliy ta’lim muassasalaridan birida tahsil olayotgan talaba bo‘lgan.
Mazkur holat Jinoyat ishlari bo‘yicha Farg‘ona shahar sudida ko‘rib chiqildi. Sud jarayonida ayblanuvchi mototsiklni to‘rt oy davomida hujjatlarsiz boshqarib kelganini tan olgan. Shuningdek, u yo‘l-transport hodisasi vaqtida o‘zi ham tan jarohati olgani sababli voqea tafsilotlarini eslay olmasligini bildirgan.
Sud hukmiga ko‘ra, ayblanuvchi 3 yil muddatga barcha turdagi transport vositalarini boshqarish huquqidan mahrum qilinib, 5 yil muddatga ozodlikdan mahrum etildi. Bundan tashqari, undan jabrlanuvchining qonuniy vakili foydasiga 44 million so‘m moddiy va 100 million so‘m ma’naviy zarar undirilishi belgilandi.
