G‘azoda sulh e’lon qilinganidan beri 983 kishi halok bo‘ldi
2025-yil oktyabrda e’lon qilingan sulhga qaramay, G‘azoda harbiy harakatlar to‘xtamayapti. So‘nggi hujumlardan birida bir kishi halok bo‘ldi, umumiy qurbonlar soni esa qariyb ming nafarga yetdi.
Isroil armiyasi G‘azo sektorining markazidagi Bureij qochqinlar lageriga dron hujumi uyushtirdi. Falastinning WAFA axborot agentligi ma’lumotiga ko‘ra, hujum oqibatida bir kishi halok bo‘lgan, yana ikki kishi jarohatlangan, deya yozmoqda Al Jazeera.
Falastin Axborot Markazi qurbon mahalliy munitsipalitet xodimi Muoviya al-Aydiy ekanini ma’lum qildi. G‘azo shahrining Tuffah mahallasida amalga oshirilgan alohida hujumda esa yana bir kishi yaralangan.
G‘azo Sog‘liqni saqlash vazirligi ma’lumotlariga ko‘ra, so‘nggi 48 soat ichida Isroil hujumlari oqibatida kamida ikki falastinlik halok bo‘lgan, 11 kishi jarohat olgan. Vazirlik hisob-kitoblariga ko‘ra, o‘tgan yil oktyabr oyida sulh e’lon qilinganidan buyon G‘azoda 983 kishi halok bo‘lgan, 3 122 kishi yaralangan.
HAMAS Isroilni sulh shartlarini muntazam ravishda buzishda aybladi. Harakat vakili Hazem Qosimning ta’kidlashicha, Isroilning davom etayotgan hujumlari va G‘azodagi nazorat chiziqlarini o‘zgartirishga urinishlari muzokaralar jarayoniga putur yetkazmoqda.
Shu bilan birga, Isroil harbiylari bosib olingan G‘arbiy Sohilda ham reydlarni davom ettirdi. WAFA ma’lumotiga ko‘ra, Baytlahm yaqinidagi bir necha hududda o‘tkazilgan amaliyotlar vaqtida ko‘plab falastinliklar jarohatlangan.
Xevron yaqinidagi Duma shaharchasida esa nogiron falastinlik erkak o‘qotar quroldan yaralandi. Hodisa yuzasidan Falastin va Isroil tomonlari turlicha ma’lumot bermoqda.
Mahalliy manbalarga ko‘ra, isroillik ko‘chmanchilar Baytlahm va boshqa aholi punktlari yaqinida falastinliklarga hujum qilgan, mulklarga zarar yetkazgan, ayrim hududlarda yo‘llarni to‘sib qo‘ygan hamda qishloq xo‘jaligi yerlariga o‘t qo‘ygan.
