Farg‘onada Lacetti va yuk mashinasi to‘qnashib, ikki kishi halok bo‘ldi
YTHga Lacetti-2 haydovchisining quvib o‘tish qoidasini buzib, qarama-qarshi harakatlanish yo‘lagiga chiqib ketgani sabab bo‘lgan.
Farg‘ona viloyatining O‘zbekiston tumanida sodir bo‘lgan yo‘l-transport hodisasi oqibatida ikki kishi vafot etdi. Bu haqda viloyat YHXB xabar berdi.
Ma’lum qilinishicha, hodisa 14-iyun kuni soat 13:30 atrofida D-098 “Qo‘qon–Yaypan–Isfara” avtomobil yo‘lining 21-kilometrida yuz bergan.
2008-yilda tug‘ilgan ayol haydovchi boshqaruvidagi Lacetti-2 avtomobili quvib o‘tish qoidasini buzib, qarama-qarshi harakatlanish yo‘lagiga chiqib ketgan va o‘z yo‘nalishida harakatlanib kelayotgan FAW Tiger yuk avtomobili bilan to‘qnashgan.
Oqibatda Lacetti-2 haydovchisi hamda avtomobilda bo‘lgan 2007-yilda tug‘ilgan yo‘lovchi shifoxonada vafot etgan.
Mazkur holat yuzasidan O‘zbekiston tumani IIB tomonidan tergovga qadar tekshiruv harakatlari olib borilmoqda.
