Andijonda poliklinikadagi fojiada qutqaruvchilar beparvolik qildimi?
FVV tarqalayotgan xabarlarga oydinlik kiritdi.
Favqulodda vaziyatlar vazirligi Marhamat tumanida quduqda 4 nafar poliklinika xodimi halok bo‘lgan hodisa vaqtida qutqaruvchilar go‘yoki beparvolik qilgani haqidagi xabarlarni rad etdi.
Hodisa 10-iyun kuni tush paytida Marhamat tumani markaziy poliklinikasi hududida sodir bo‘lgan. Dastlab texnik xodimlardan biri xavfsizlik qoidalariga rioya qilmagan holda nasos motorini sozlash uchun quduqqa tushgan. Quduq ichida to‘plangan zaharli gazlar sabab u hushini yo‘qotgan.
Shundan so‘ng unga yordam berishga uringan yana uch nafar texnik xodim ham birin-ketin quduqqa tushgan va zaharli gazlardan zaharlanib halok bo‘lgan.
FVBga ko‘ra, hodisa haqida xabar kelib tushishi bilan Marhamat tumani Favqulodda vaziyatlar bo‘limi qutqaruvchilari voqea joyiga yetib borgan. Tuman bo‘limi rahbarining aytishicha, qutqaruvchilar kelgan paytda quduq ichidagi to‘rt nafar xodimda hayot alomatlari bo‘lmagan. Bu holat videoyozuv bilan ham tasdiqlanishi bildirilgan.
Marhumlarning jasadlarini quduqdan olib chiqish uchun Andijon viloyati Favqulodda vaziyatlar boshqarmasining radiatsion-kimyoviy muhofazaga ixtisoslashgan maxsus bo‘linmasi jalb etilgan.
Boshqarma, shuningdek, qutqaruvchilar voqea joyiga yetib kelganida quduqdagi odamlar tirik bo‘lgani va yordam so‘ragani, biroq maxsus himoya vositalari yo‘qligi sabab ularga yordam ko‘rsatilmagani haqidagi xabarlar haqiqatga mos emasligini ta’kidladi.
