JCH — 2026. Qatar Shveysariyadan ochko tortib oldi, Braziliyada durang, Shotlandiya va Avstraliyada g‘alaba
24-yillik tanaffusdan so'ng mundialga chiqqan Turkiya musobaqani kutilmagan mag‘lubiyat bilan boshladi.
AQSH, Kanada va Meksika mezbonlik qilayotgan 2026 yilgi Jahon chempionatida birinchi tur uchrashuvlari davom etmoqda.
2026-yil 14-iyun kuni tongda musobaqaning “B”, “C” va “D” guruhlaridan o‘rin olgan 4 uchrashuv yakuniga yetdi.
Dastlabki bahsda Qatar terma jamoasi Shveysariyaga qarshi maydonga chiqib, hakam tomonidan qo‘shib berilgan daqiqalarda hisobni tenglashtirib qoldi va mundiallar tarixidagi ilk ochkosini qo‘lga kiritdi. O‘yinning 17 daqiqasida Embolo penaltidan yevropaliklarni hisobda oldinga olib chiqqan bo‘lsa, 90+6-daqiqada Bualem Xuxi hisobdagi muvozanatni tikladi, 1:1. Mazkur bahsdan so‘ng “B” guruhida barcha jamoalar 1 ochkodan bo‘lishib turibdi.
Kecha bo‘lib o‘tgan Kanada — Bosniya va Gersegovina jamoalari ham murosa yo‘lini tanlagandi.Turnir 1-turining markaziy o‘yini deya e’tirof etilgan Braziliya — Marokash uchrashuvi ham 1:1 hisobida yakun topdi. Ushbu bahsning 21-daqiqasida Ismoil Saybari marokashliklarning goliga mualliflik qilgan bo‘lsa, 32-daqiqada Vinisius Junior ajoyib harakat qilib, Yassin Bunu qo‘riqlayotgan Marokash darvozasini ishg‘ol qildi. Shundan so‘ng o‘yinda boshqa gol kiritilmadi, 1:1.
“C” guruhidan o‘rin olgan yana bir bahsda Shotlandiya terma jamoasi Jon Makginning 28-daqiqada kiritgan yagona goli evaziga Gaiti terma jamoasini mag‘lub etdi va 3 ochko bilan guruhning yaqqol peshqadamiga aylanib oldi.
“D” guruhida esa kichik sensatsiya qayd etildi. Roberto Manchini boshchiligidagi Turkiya terma jamoasi Avstraliyaga qarshi bahsda ustunlik qilib o‘ynagan bo‘lsa ham yakunda 0:2 hisobida “kenguru”larga imkoniyatni boy berib qo‘ydi. Uchrashuvning 27-daqiqasida Irankunda qarshi hujumda raqibni jazolagan bo‘lsa, 75-daqiqaga kelib Konnor Metkalf hisobni ishonchli ko‘rinishga keltirib qo‘ydi.
Shu tariqa “D” guruhida musobaqa mezbonlaridan biri, ilk turda Paragvayni yirik hisobda mag‘lub etgan AQSH hamda Avstraliya 3 ochkodan jamg‘arib peshqadamlik qilmoqda.
