Navoiyda 3 kishining o‘limiga sabab bo‘lgan avtobus haydovchisi 10 yilga qamaldi
Sudda haydovchi suv ichishga chalg‘ib qolgani tufayli YTH yuz berganini aytdi.
Jinoyat ishlari bo‘yicha Tomdi tuman sudi Navoiy viloyatida uch kishining o‘limiga sabab bo‘lgan yo‘l-transport hodisasi bo‘yicha avtobus haydovchisiga nisbatan hukm chiqardi. Bu haqda Kun.uz xabar berdi.
Hukmga ko‘ra, hodisa 2026-yil 5-yanvar kuni tongda A-379 “Navoiy–Uchquduq” avtomobil yo‘lining 167–168-kilometrlari oralig‘ida sodir bo‘lgan. 1986-yilda tug‘ilgan X.Sh. boshqaruvidagi “Zarafshon–Navoiy” yo‘nalishidagi avtobus haydovchining ehtiyotsizligi oqibatida yo‘ldan chiqib ketib, ag‘darilgan.
Oqibatda uch nafar yo‘lovchi, jumladan, bir nafar voyaga yetmagan shaxs voqea joyida vafot etgan. Yana 21 nafar yo‘lovchi turli darajadagi tan jarohatlari olgan.
Sudda haydovchi aybiga iqror bo‘lib, transport vositasini boshqarib ketayotib suv ichish chog‘ida chalg‘ib qolganini aytgan. Uning ko‘rsatmasiga ko‘ra, suv idishining qopqog‘ini qidirayotgan vaqtda rulni nazoratsiz burib yuborgan, shundan so‘ng avtobus yo‘ldan chiqib ketib, ag‘darilgan.
Tomdi tuman sudi X.Sh.ni Jinoyat kodeksining 266-moddasi 3-qismi “a” bandida nazarda tutilgan jinoyatni (transport vositalari harakati yoki ulardan foydalanish xavfsizligi qoidalarini buzish odamlar o‘limiga sabab bo‘lishi) sodir etganlikda aybdor deb topdi.
Unga 3 yil davomida barcha turdagi transport vositalarini boshqarish huquqidan mahrum qilgan holda 10 yil muddatga ozodlikdan mahrum etish jazosi tayinlandi.
Shuningdek, sud qarori bilan avtobus tegishli bo‘lgan MCHJ foydasiga 147 million so‘m miqdorida moddiy zarar undirilishi belgilangan.
