Shavkat Mirziyoyev Si Szinpinni tavallud kuni bilan tabrikladi
Maktubda ikki davlat o‘rtasidagi do‘stlik, o‘zaro ishonch va “Bir makon — bir yo‘l” doirasidagi hamkorlik yuksak baholandi.
Shavkat Mirziyoyev Si Szinpinga tavallud kuni munosabati bilan tabrik yo'lladi. Bu haqda Prezident matbuot kotibi ma'lum qildi.
Maktubda Si Szinpin Xitoy Xalq Respublikasi va Xitoy Kommunistik partiyasining yetakchi siyosiy arbobi sifatida Vatan va xalq farovonligi yo‘lida katta mas’uliyat va strategik tafakkur bilan mamlakatni yangi taraqqiyot bosqichlariga olib chiqayotgani ta’kidlangan.
Shuningdek, Xitoy modernizatsiyasi izchil davom etayotgani, milliy yuksalish sari yo‘naltirilgan siyosat mamlakat tarixida muhim o‘rin egallayotgani qayd etilgan.
O‘zbekiston va Xitoy o‘rtasidagi munosabatlar bugungi kunda yuksak darajaga ko‘tarilgani, ikki davlat o‘rtasidagi strategik sheriklik, o‘zaro ishonch va do‘stlik aloqalari izchil rivojlanib borayotgani alohida qayd etilgan.
Prezident, shuningdek, “Bir makon — bir yo‘l” tashabbusi doirasidagi hamkorlik samarali natijalar berayotganini va barcha kelishuvlarni to‘liq amalga oshirish ikki tomonlama munosabatlarni yangi sifat bosqichiga olib chiqishiga ishonch bildirgan.
Tabrik yakunida davlat rahbari Si Szinpinga mustahkam sog‘liq, oilaviy baxt va mas’uliyatli faoliyatida muvaffaqiyatlar, Xitoy xalqiga esa tinchlik va barqaror taraqqiyot tilagan.
