Toshkentning barcha tumanlarida O‘zbekiston MTJ o‘yinlari katta ekranlarda namoyish etiladi
Eng yirik tomosha maydoni “Bunyodkor” stadioni hududida tashkil etiladi.
Futbol bo‘yicha O‘zbekiston milliy terma jamoasining Jahon chempionati guruh bosqichidagi uchrashuvlari Toshkent shahrining barcha tumanlarida tashkil etiladigan maxsus tomosha maydonlarida to‘g‘ridan-to‘g‘ri namoyish etiladi. Bu haqda poytaxt hokimligi xabar berdi.
Tomosha maydonlari Bektemir tumanidagi Rohat mahallasi, Mirobod tumanidagi “Furqat” bog‘i, Mirzo Ulug‘bek tumanidagi “Central Park”, Olmazor tumanidagi “G‘alaba bog‘i”, Sergeli tumanidagi Markaziy xiyobon, Uchtepa tumanidagi “Seul Eko park”, Chilonzor tumanidagi “G‘afur G‘ulom” bog‘i, Shayxontohur tumanidagi “Anhor-Lokomotiv” bog‘i, Yunusobod sport majmuasi, Yakkasaroy tumanidagi “Do‘stlik” bog‘i, Yangihayot tumanidagi INDEX park hamda Yashnobod tumanidagi “Ashxobod” sayilgohida tashkil etiladi.
Shuningdek, eng yirik tomosha maydoni “Bunyodkor” stadioni hududida bo‘ladi. Bu yerda bir vaqtning o‘zida 10 ming nafar muxlis O‘zbekiston terma jamoasini qo‘llab-quvvatlashi mumkin bo‘ladi.
O‘zbekiston milliy terma jamoasi guruh bosqichida 18-iyun kuni Kolumbiyaga qarshi, 23-iyun kuni Portugaliyaga qarshi hamda 28-iyun kuni DR Kongo terma jamoasiga qarshi maydonga tushadi. Uchrashuvlar Toshkent vaqti bilan mos ravishda soat 07:00, 22:00 va 04:30 da boshlanadi.
Eslatib o‘tamiz, mamlakat bo‘ylab 220 ta maktabda ham futbol tomoshalari uchun zarur sharoitlar yaratiladi hamda O‘zbekiston terma jamoasining Jahon chempionatidagi o‘yinlari katta ekranlarda jonli efirda namoyish etiladi.
