Toshkentda chang-to‘zon kuzatilishi mumkin — Maxsus komissiya ogohlantirdi
Shamol 12–15 m/s gacha kuchayishi, ayrim hududlarda yomg‘ir yog‘ishi kutilmoqda.
Jahon meteorologiya tashkilotining Chang-qum bo‘ronlari bo‘yicha Pekin mintaqaviy markazi hamda Gidrometeorologiya xizmati agentligi prognozlariga ko‘ra, bugun Toshkent shahrida nam havo massalari kirib kelishi arafasida qisqa muddatli chang-to‘zon hodisalari kuzatilishi mumkin.
Ma’lum qilinishicha, kun davomida ob-havo o‘zgaruvchan bo‘lib, ayrim hududlarda qisqa muddatli yomg‘ir va momaqaldiroq kuzatilishi ehtimoli mavjud. Shamol tezligi 3–8 metr/soniyani tashkil etadi, ayrim joylarda esa 12–15 metr/soniyagacha kuchayishi mumkin. Kuchli shamol ta’sirida ayrim hududlarda chang-to‘zonlar yuzaga kelishi kutilmoqda.
Mutaxassislarning qayd etishicha, mazkur holat tufayli atmosfera havosida chang zarrachalari, xususan PM10 ko‘rsatkichlari qisqa muddatga ortishi mumkin. Biroq yog‘ingarchiliklar hisobiga kunning ikkinchi yarmida havo sifati asta-sekin yaxshilanishi prognoz qilinmoqda.
Shu munosabat bilan nafas yo‘llari kasalliklari, allergiya hamda yurak-qon tomir tizimi bilan bog‘liq muammolari mavjud fuqarolarga ehtiyot choralarini ko‘rish tavsiya etildi. Zarurat bo‘lmaganda uzoq vaqt ochiq havoda bo‘lmaslik, deraza va eshiklarni yopiq saqlash hamda himoya niqoblaridan foydalanish tavsiya qilinmoqda.
Hozirda atmosfera havosi holati Maxsus komissiya tomonidan doimiy nazorat va monitoring ostiga olingan.
