Hindistonda Telegram vaqtincha cheklab qo‘yildi
Pavel Durov Telegram bloklanishi 150 million foydalanuvchiga ta’sir qilganini aytib, qarorni tanqid qilgan.
Hindiston hukumati NEET imtihonini qayta topshirish arafasida firibgarlik xavfi kuchaygani sababli Telegram messenjerining faoliyatini 22-iyunga qadar vaqtincha chekladi.
Milliy test agentligi (NTA) ma’lumotlariga ko‘ra, ayrim shaxslar Telegram kanallari orqali imtihon materiallariga pullik kirish imkoniyatini taklif qilgan. Shu munosabat bilan hukumat imtihon jarayonining shaffofligini ta’minlash maqsadida messenjer faoliyatiga vaqtinchalik cheklovlar joriy etgan.
Telegram asoschisi Pavel Durov ushbu qarorni tanqid qilib, bloklash 150 milliondan ortiq foydalanuvchiga ta’sir qilganini va bu noto‘g‘ri qaror bo‘lganini ta’kidlaga.
Uning so‘zlariga ko‘ra, Telegram so‘nggi haftalarda Hindistonda imtihon materiallari va firibgarlik bilan bog‘liq yuzlab kanallarni o‘chirib tashlagan. Durov, shuningdek, platformani bloklash ma’lumotlar tarqalishini to‘xtatmaganini, chunki noqonuniy kontent boshqa ilovalarga ko‘chib o‘tganini qayd etgan.
Avvalroq Hindiston rasmiylari imtihon javoblari muddatidan oldin tarqalganidan so‘ng NEET test natijalarini bekor qilgan edi.
