"O‘zbekiston iqtisodiyoti 2026-yilda 180 mlrd dollardan oshishi kutilmoqda" — Prezident
Davlat rahbari O‘zbekiston teng huquqli va o‘zaro manfaatli hamkorlikka tayyor investorlar uchun doimo ochiq ekanini ta’kidladi.
Prezident Shavkat Mirziyoyev Toshkent xalqaro investitsiya forumining yalpi majlisida so‘zlagan nutqida O‘zbekiston iqtisodiyoti jadal sur’atlarda o‘sib borayotganini ta’kidlab, 2026-yil yakuniga qadar mamlakat yalpi ichki mahsuloti 180 milliard dollardan oshishi kutilayotganini ma’lum qildi.
“Ko‘pchilikning yodida, biz to‘rt yil avval bo‘lib o‘tgan ilk forumda 2026-yil yakuniga kelib, O‘zbekistonning yalpi ichki mahsulotini 100 milliard dollarga yetkazishni maqsad qilgan edik. Jadal sur’atlarda o‘sib borayotgan iqtisodiyotimiz bu yil 180 milliard dollardan oshishi kutilmoqda!”, – dedi Prezident.
Prezidentning aytishicha, o‘tgan yilda O‘zbekiston iqtisodiyoti 7,7 foizga o‘sgan, iqtisodiyotga 43 milliard dollar investitsiya jalb etilgan. Shuningdek, mamlakatning xalqaro zaxiralari 70 milliard dollardan oshgan.
Prezident so‘nggi yillarda O‘zbekistonga 150 milliard dollardan ortiq xorijiy investitsiya jalb qilinganini, shundan 123 milliard dollari oxirgi besh yil hissasiga to‘g‘ri kelishini qayd etdi.
Davlat rahbari O‘zbekiston teng huquqli va o‘zaro manfaatli hamkorlikka tayyor investorlar uchun doimo ochiq ekanini ta’kidladi.
