Surxondaryoda qariyb 38 kg giyohvandlik vositasi to‘xtatib qolindi
Ushbu giyohvandlik vositalari Afg‘onistondan olib kirilgan. 2 nafar gumonlanuvchi o‘zidan “jonli konteyner” sifatida foydalangan.
Surxondaryo viloyatida o‘tkazilgan tezkor tadbirlar davomida Afg‘onistondan O‘zbekistonga kontrabanda yo‘li bilan olib kirilgan 37,6 kilogrammdan ortiq giyohvandlik vositalari musodara qilindi. Bu haqda Davlat xavfsizlik xizmati ma’lum qildi.
Qayd etilishicha, DXXning Surxondaryo viloyati boshqarmasi hamda viloyat IIB xodimlari hamkorligida o‘tkazilgan tezkor tadbirda Afg‘onistondan 25 kg 444 gramm opiy va 11 kg 86 gramm gashish olib kirilgani aniqlangan. Giyohvandlik vositalarini nazorat ostida Samarqand shahriga yetkazish jarayonida ularni qabul qilib olayotgan ikki nafar mahalliy va ikki nafar xorijlik fuqaro qo‘lga olingan.
Shuningdek, DXX, Chegara qo‘shinlari, ichki ishlar va bojxona organlari hamkorligida o‘tkazilgan yana bir tadbirda Termiz xalqaro savdo markazida 1 kg 76 gramm opiyni 5 ming AQSH dollariga sotishga uringan ikki nafar Afg‘oniston fuqarosi ushlangan.
Tergov davomida ular giyohvandlik vositalarini O‘zbekistonga yashirin olib kirishda o‘z tanalaridan “jonli konteyner” sifatida foydalangani aniqlangan.
Mazkur holatlar yuzasidan Jinoyat Kodeksining 246-moddasi 2-qismi va 273-moddasi 5-qismi bilan jinoyat ishlari qo‘zg‘atilib, “qamoq” ehtiyot chorasi qo‘llanildi. Tergov harakatlari olib borilmoqda.
