"Agar Ukraina yonsa, sizning Moskvangiz ham yonadi" — Zelenskiy
Ukraina Rossiyaga javob zarbalari haqida bayonot berdi.
Ukraina prezidenti Vladimir Zelenskiy Rossiya hududidagi nishonlarga uzoq masofali zarbalar berilishi mutlaqo oqlanishini ta’kidladi. Bu haqda u 18-iyun kuni ommaviy axborot vositalariga bergan bayonotida ma’lum qilgan deb xabar bermoqda FREEDOM.
Zelenskiy agar Rossiya urushni tugatishdan bosh tortsa, Ukraina javob choralarini davom ettirishini qayd etgan.
“Moskvaga mutlaqo adolatli javobimiz bor. Agar Putin bu urushni tugatishni istamasa, biz jim o‘tirmaymiz — javob beramiz. Javob kuchli va adolatli bo‘lishi kerak”, — degan Ukraina prezidenti.
U shuningdek, Rossiya tomonidan Kiyevdagi Lavra hududiga qilingan hujumlarni eslatib, Ukraina bunga javoban zarur choralarni ko‘rishini bildirganini qayd etgan.
Zelenskiyning so‘zlariga ko‘ra, Ukraina urushni istamaydi va uni boshlamagan, biroq davom etayotgan harbiy harakatlarga javoban harakat qilishga majbur bo‘lmoqda.
“Biz bu urushni xohlamadik va xohlamaymiz. Ammo agar Ukraina yonib ketsa, Moskvangiz ham yonadi. Shuning uchun urushni tugatish vaqti keldi”, — degan Zelenskiy.
Shuningdek, Ukraina prezidenti Rossiyaga nisbatan kuchaytirilgan sanksiyalar va iqtisodiy bosimni tinchlikka erishishning asosiy vositasi sifatida ko‘rayotganini bildirgan.
Eslatib o'tamiz, avvalroq Ukraina Moskvadagi turar joy binolariga va katta miqdorda yoqilg'i yetkazib beruvchi Moskva neftni qayta ishlash zavodiga dronlar hujumi uyushtirgan edi.
