Украина Москвага дрон ҳужумлари уюштирди

 

Москва вилояти губернатори Андрей Воробёв маълум қилишича, Украина томонидан амалга оширилган оммавий дрон ҳужумлари оқибатида Москва вилоятининг бир қатор ҳудудларида турар жойлар ва фуқаролик инфратузилмасига зарар етган.

 

Хусусан, Жуковский шаҳридаги Гагарин кўчасида жойлашган кўп қаватли турар жой биносига дрон урилган. Натижада 23 ва 24-қаватлар оралиғидаги ёнғин чиқиш йўлаги ҳамда иккита балкон плитаси шикастланган. Дастлабки маълумотларга кўра, қурбонлар йўқ, бино аҳолиси эвакуация қилинган.

 

Любертсида дрон қолдиқлари фитнес маркази ва саноат майдонига тушган. Шунингдек, савдо маркази томига тушган қолдиқлар ёнғинга сабаб бўлган. Ёнғин кўлами ва эҳтимолий жабрланганлар ҳақидаги маълумотлар аниқлаштирилмоқда.

 

Электростал шаҳрининг Степаново қишлоғида уриб туширилган дрон қолдиқлари хусусий уйнинг томига зарар етказган. Бир аёл енгил жароҳат олган. Радио кўчасида дрон қолдиқлари сабаб юзага келган ёнғин қисқа вақт ичида бартараф этилган.

 

Чехов туманидаги Масново-Жуково қишлоғида дрон ёзги уйга зарба берган. Бино ва қўшимча иншоотлар вайрон бўлган, жабрланганлар қайд этилмаган. Крюково қишлоғида эса дрон қолдиқлари бир нечта ёзги коттежларга тушган, етказилган зарар миқдори аниқланмоқда.

 

Павловский Посаддаги боғдорчилик ширкатида дрон ҳужуми оқибатида иккита ёзги уй ёниб кетган. Воқеа жойида фавқулодда хизматлар иш олиб бормоқда.

 

Шу билан бирга, Москва мери Сергей Собянин дронларнинг бир қисми Москва нефтни қайта ишлаш заводи томон йўналтирилганини маълум қилган. Унинг сўзларига кўра, ҳаво ҳужумидан мудофаа тизимлари ҳужумни қайтаришда давом этмоқда, фавқулодда хизматлар эса оқибатларни бартараф этиш чораларини кўрмоқда.

 

Россия Мудофаа вазирлиги маълумотларига кўра, Москва вақти билан соат 07:30 ҳолатига кўра, пойтахт йўналишида учган 137 та дрон ҳаво ҳужумидан мудофаа воситалари томонидан уриб туширилган.

 

Дронлар таҳдиди сабаб Шереметево аэропортида ҳам вақтинчалик хавфсизлик чоралари кучайтирилган.