Qirg‘iziston parlamenti spikeri Tashiyevni “shoqol” deb atadi

 

Qirg‘izistonda “75 lar xati” nomi bilan tanilgan shov-shuvli jinoyat ishi bo‘yicha sud jarayoni davom etmoqda. Mazkur ish doirasida Milliy xavfsizlik davlat qo‘mitasining sobiq rahbari Qamchibek Tashiyev, sobiq bosh prokuror Qurmanqul Zulushyev, Jo‘qorg‘u Keneshning sobiq spikeri Nurlanbek Turg‘unbek o'g'li hamda yana bir qator sobiq amaldorlar ayblanuvchi sifatida ishtirok etmoqda. Bu haqda 24.kg nashri xabar berdi.

 

Bishkekda bo‘lib o‘tgan navbatdagi sud majlisida ayrim advokatlar jurnalistlarning ayblanuvchilarga haddan tashqari yaqinlashayotganidan norozilik bildirib, jarayonni yana yopiq tarzda o‘tkazishni taklif qilgan. Sudya Aziret Mederov ham sud zalidagi odamlar sonining ko‘pligiga e’tibor qaratgan.

 

Shu bilan birga, Jo‘qorg‘u Kenesh spikeri Marlen Mamataliyev “75 lar xati” tashabbuskorlarini keskin tanqid qilgan.

 

“Shoqollar va shoqolchalar o‘z o‘yinlarini o‘tkazmoqchi bo‘lishdi, biroq ular hech qachon sherni yenga olmasligini unutishdi. Chunki sher ortida 7 million inson turibdi”, — degan u 17-iyun kuni parlament yalpi majlisida.

 

Spikerning ta’kidlashicha, maktub tashabbuskorlari o‘zlariga qo‘yilgan ayblovlarni rad etmoqda. Uning fikricha, ular o‘z harakatlari va niyatlarini tan olganlari ma’qul bo‘lardi. Marlen Mamataliyev mazkur masalaga yakuniy huquqiy bahoni sud berishi kerakligini qayd etgan.

 

Ma’lumotlarga ko‘ra, 15-iyundan boshlab “75 lar xati” ishi bo‘yicha sud jarayoni ilk bor ochiq tartibda o‘tkazilmoqda.

 

Eslatib o‘tamiz, joriy yilning 10-fevral kuni Qirg‘iziston Milliy xavfsizlik davlat qo‘mitasi raisi va Bosh vazir o‘rinbosari Qamchibek Tashiyev Prezident Sadir Japarov farmoni bilan lavozimidan ozod etilgan edi.