Ukraina Moskvaga dron hujumlari uyushtirdi
Hujumlar oqibatida turar joylar va infratuzilma obyektlari zarar ko‘rgan.
Moskva viloyati gubernatori Andrey Vorobyov ma’lum qilishicha, Ukraina tomonidan amalga oshirilgan ommaviy dron hujumlari oqibatida Moskva viloyatining bir qator hududlarida turar joylar va fuqarolik infratuzilmasiga zarar yetgan.
Xususan, Jukovskiy shahridagi Gagarin ko‘chasida joylashgan ko‘p qavatli turar joy binosiga dron urilgan. Natijada 23 va 24-qavatlar oralig‘idagi yong‘in chiqish yo‘lagi hamda ikkita balkon plitasi shikastlangan. Dastlabki ma’lumotlarga ko‘ra, qurbonlar yo‘q, bino aholisi evakuatsiya qilingan.
Lyubertsida dron qoldiqlari fitnes markazi va sanoat maydoniga tushgan. Shuningdek, savdo markazi tomiga tushgan qoldiqlar yong‘inga sabab bo‘lgan. Yong‘in ko‘lami va ehtimoliy jabrlanganlar haqidagi ma’lumotlar aniqlashtirilmoqda.
Elektrostal shahrining Stepanovo qishlog‘ida urib tushirilgan dron qoldiqlari xususiy uyning tomiga zarar yetkazgan. Bir ayol yengil jarohat olgan. Radio ko‘chasida dron qoldiqlari sabab yuzaga kelgan yong‘in qisqa vaqt ichida bartaraf etilgan.
Chexov tumanidagi Masnovo-Jukovo qishlog‘ida dron yozgi uyga zarba bergan. Bino va qo‘shimcha inshootlar vayron bo‘lgan, jabrlanganlar qayd etilmagan. Kryukovo qishlog‘ida esa dron qoldiqlari bir nechta yozgi kottejlarga tushgan, yetkazilgan zarar miqdori aniqlanmoqda.
Pavlovskiy Posaddagi bog‘dorchilik shirkatida dron hujumi oqibatida ikkita yozgi uy yonib ketgan. Voqea joyida favqulodda xizmatlar ish olib bormoqda.
Shu bilan birga, Moskva meri Sergey Sobyanin dronlarning bir qismi Moskva neftni qayta ishlash zavodi tomon yo‘naltirilganini ma’lum qilgan. Uning so‘zlariga ko‘ra, havo hujumidan mudofaa tizimlari hujumni qaytarishda davom etmoqda, favqulodda xizmatlar esa oqibatlarni bartaraf etish choralarini ko‘rmoqda.
Rossiya Mudofaa vazirligi ma’lumotlariga ko‘ra, Moskva vaqti bilan soat 07:30 holatiga ko‘ra, poytaxt yo‘nalishida uchgan 137 ta dron havo hujumidan mudofaa vositalari tomonidan urib tushirilgan.
Dronlar tahdidi sabab Sheremetyevo aeroportida ham vaqtinchalik xavfsizlik choralari kuchaytirilgan.
