Andijonda qo‘shnisining farzandini urgan erkak ushlandi
Unga nisbatan jinoyat ishi qo‘zg‘atilib, tergov harakatlari olib borilmoqda.
Andijon viloyatining Shahrixon tumanida voyaga yetmagan bolaga nisbatan kuch ishlatilgani aks etgan videolar ijtimoiy tarmoqlarda keng tarqaldi.
Hodisa 18-iyun kuni soat 15:30 atrofida Namozgoh mahallasi hududidan oqib o‘tuvchi Shahrixonsoy kanalida sodir bo‘lgan. Dastlab 2016-yilda tug‘ilgan ikki nafar voyaga yetmagan bola cho‘milish vaqtida o‘zaro janjallashib qolgan.
Shundan so‘ng bolalardan birining otasi, 1988-yilda tug‘ilgan fuqaro mojaroga aralashib, qo‘shnisining voyaga yetmagan farzandiga nisbatan kuch ishlatgan. Oqibatda bola tan jarohati olgan.
Mazkur holat yuzasidan Shahrixon tumani IIB huzuridagi tergov bo‘linmasi tomonidan Jinoyat kodeksining 277-moddasi ikkinchi qismi “d” bandi bilan jinoyat ishi qo‘zg‘atildi. Gumonlanuvchi protsessual tartibda ushlangan.
E'lon qilingan videomurojaatda erkak o‘z qilmishidan pushaymon ekanini bildirib, jabrlanuvchi bolaning ota-onasi, yaqinlari va jamoatchilikdan uzr so‘radi.
Hozirda mazkur jinoyat ishi bo‘yicha dastlabki tergov harakatlari davom ettirilmoqda.
