AQSh va Eron oʻrtasidagi kelishuv tinchlik uchun mustahkam zamin yaratadi — TIV
Oʻzbekiston AQSh va Eron oʻrtasida imzolangan oʻzaro anglashuv memorandumini mintaqaviy xavfsizlik va barqarorlik yoʻlidagi muhim diplomatik yutuq sifatida baholadi.
Oʻzbekiston AQSH va Eron oʻrtasida oʻzaro Anglashuv memorandumi imzolanganini hozirgi murakkab xalqaro vaziyatda keskinlikni yumshatish, mintaqaviy xavfsizlik va barqarorlikni mustahkamlash yoʻlidagi muhim diplomatik yutuq sifatida olqishladi.
Qayd etilishicha, AQSh va Eron rahbariyatining muhim pallada namoyon etgan siyosiy irodasi hamda uzoqni koʻzlagan yondashuvi xalqaro hamjamiyat uzoq vaqt kutgan tinchlikka erishish yoʻlidagi barqaror yechim uchun mustahkam zamin yaratmoqda.
Bayonotda ushbu muhim oʻzaro anglashuvga erishish uchun zarur sharoitlarni shakllantirishga hissa qoʻshgan Pokiston va Qatar davlatlarining roli alohida eʼtirof etildi. Shuningdek, Turkiya, Saudiya Arabistoni, Misr hamda boshqa mintaqaviy hamkorlarning saʼy-harakatlari ham yuqori baholandi.
Oʻzbekiston tomoni muzokaralarning navbatdagi bosqichlari konstruktiv ruhda davom etishi, erishilgan kelishuvlar izchil va samarali amalga oshirilishi hamda mintaqada barqarorlikni mustahkamlashga xizmat qilishiga umid bildirdi.
Shu bilan birga, nizo va qarama-qarshiliklarni xalqaro huquq tamoyillari, oʻzaro hurmat va barcha tomonlarning manfaatlarini hisobga olgan holda diplomatik vositalar orqali hal etish tinchlik va xavfsizlikni taʼminlashning eng muhim sharti boʻlib qolishi taʼkidlandi.
