JCH-2026: Kanada Qatarni 6:0 hisobida mag'lub etdi
Qatar ikki futbolchisining chetlatilishi ortidan 9 kishi bilan o‘yinni yakunlagan.
2026-yilgi futbol bo‘yicha Jahon chempionatining guruh bosqichi ikkinchi turida Kanada terma jamoasi Qatar ustidan ishonchli g‘alabaga erishdi. Vankuver shahridagi BC Place stadionida bo‘lib o‘tgan uchrashuv mezbonlarning 6:0 hisobidagi g‘alabasi bilan yakunlangan.
Kanadaliklar safida Kayl Larin 16-daqiqada hisobni ochgan bo‘lsa, Jonatan Devid 29-, 45+3- va 90+2-daqiqalarda raqib darvozasini ishg‘ol qilib, xet-trik qayd etgan. Yana bir golni 64-daqiqada Natan-Dilan Saliba urgan. 75-daqiqada esa qatarlik Muhammad Al-Mannai o‘z darvozasini ishg‘ol qilib, hisobni yanada yiriklashtirgan.
Uchrashuv davomida Qatar terma jamoasi ikki futbolchisidan ayrilgan. Dastlab 33-daqiqada Homam Al-Amin qo‘pol harakati uchun to‘g‘ridan-to‘g‘ri qizil kartochka olib maydonni tark etgan. Ikkinchi bo‘limda esa Assim Madibo Ismoil Konening og‘ir jarohatlanishiga sabab bo‘lgan vaziyatdan so‘ng maydondan chetlatilgan. Shundan so‘ng Qatar uchrashuvni to‘qqiz futbolchi bilan yakunlashga majbur bo‘lgan.
B guruhining boshqa uchrashuvida Shveytsariya Bosniya va Gertsegovinani 4:1 hisobida mag‘lub etgan. Natijada Kanada olti ochko bilan guruh peshqadamiga aylangan.
Guruh bosqichining uchinchi turida Kanada terma jamoasi Shveytsariya bilan, Qatar esa Bosniya va Gertsegovina bilan bahs olib boradi.
2026-yilgi Jahon chempionati 11-iyundan 19-iyulgacha AQSh, Kanada va Meksikada bo‘lib o‘tmoqda. Amaldagi jahon chempioni Argentina hisoblanadi.
