Shveytsariyada rejalashtirilgan AQSh–Eron muzokaralari bekor qilindi
Uchrashuv o‘tkazilmasligi Shveytsariya TIV tomonidan tasdiqlangan.
Reuters agentligining Shveytsariya Tashqi ishlar vazirligiga tayanib xabar berishicha, 19-iyun kuni Shveytsariyaning Burgenstok kurortida bo‘lib o‘tishi rejalashtirilgan AQSh va Eron o‘rtasidagi muzokaralar bekor qilingan.
Rasmiy ma’lumotga ko‘ra, uchrashuv o‘tkazilmasligi Shveytsariya TIV tomonidan tasdiqlangan.
Shu bilan birga, AQSh tomoni vitse-prezident J.D. Vensning Shveytsariyaga safari bekor qilinganini ma’lum qilgan. Biroq Vashington diplomatik muloqot to‘liq to‘xtab qolmaganini ta’kidlab, Eron bilan texnik muzokaralar imkon qadar tezroq boshlanishiga umid bildirmoqda.
Avvalroq AQSh va Eron o‘rtasida vaqtinchalik o‘zaro anglashuv memorandumi imzolangani haqida xabar berilgan edi. Unga ko‘ra, 60 kunlik harbiy harakatlarni to‘xtatish, Hormuz bo‘g‘ozi orqali yuk tashishni tiklash, Vashingtonning Eron portlariga qarshi dengiz blokadasini bekor qilish hamda muzokaralarning yangi bosqichini boshlash kabi bandlar nazarda tutilgan.
Eron Tashqi ishlar vazirligi vakillari esa alohida imzolash marosimi o‘tkazish zarur emasligini bildirgan.
