Tramp Eron bilan memorandumni Tehronning taslim bo‘lishi deb atadi
AQSh Kongressdagi ayrim siyosatchilar esa memorandumni Eron emas, AQShning taslim bo‘lishiga o‘xshatdi.
AQSh prezidenti Donald Tramp Eron bilan imzolangan o‘zaro anglashuv memorandumini Tehronning amalda taslim bo‘lishi sifatida baholadi. U bu haqda Axios nashriga bergan intervyusida ma’lum qilgan.
Trampning ta’kidlashicha, Qo‘shma Shtatlar Eronni harbiy jihatdan to‘liq mag‘lub etgan va erishilgan kelishuvni “deyarli shartsiz taslim bo‘lish” sifatida ko‘rmoqda.
“Bu, ehtimol, shartsiz taslim bo‘lishdir. Men shunday deb hisoblayman. Biz ularni harbiy jihatdan to‘liq mag‘lub etdik”, — degan AQSh prezidenti.
Shuningdek, Tramp AQSh dunyodagi eng qudratli harbiy kuchga egaligini ta’kidlab, Eron portlariga qarshi joriy etilgan dengiz blokadasi misolida Vashingtonning imkoniyatlarini namoyish qilganini qayd etgan.
“Bizda dunyodagi eng kuchli harbiy salohiyat mavjud. Men Eron uchun dengiz blokadasini joriy qildim va birorta ham kema o‘ta olmadi”, — degan u.
AQSh rahbari mojarodan qanday saboq chiqargani haqidagi savolga javoban “kuch ishlatish imkoniyatlarining chegarasi yo‘q”, deya javob bergan.
Avvalroq Eron oliy rahbari Mojtabo Xomanaiy AQSh bilan o‘zaro anglashuv memorandumini imzolashga ruxsat bergani haqida xabarlar tarqalgan edi. Uning fikricha, AQSh prezidenti Donald Tramp turli bosim vositalari orqali kelishuvga erishishga uringan.
Shu bilan birga, AQSh Kongressidagi ayrim demokrat va respublikachi qonunchilar Tramp ma’muriyatini Eron bilan tuzilgan kelishuv yuzasidan tanqid qilgan. Jumladan, senator Richard Blumental ushbu memorandumni “AQSh uchun uyatli kelishuv” deb atab, hujjat ko‘proq Vashingtonning emas, balki AQShning o‘zi taslim bo‘lgandek taassurot uyg‘otayotganini ta’kidlagan.
