Isroilning Livanga bergan zarbalari oqibatida kamida 16 kishi halok bo‘ldi

Isroil armiyasining Livan janubiga uyushtirgan zarbalari oqibatida kamida 16 kishi halok bo‘ldi, yana 12 kishi yaralandi. Bu haqda Livan fuqaro mudofaasi xizmatiga tayanib The Guardian xabar berdi.

 

Ma’lumotlarga ko‘ra, qutqaruvchilar Nabatiya tumanida davom etayotgan hujumlar oqibatlarini bartaraf etish ishlari bilan shug‘ullanmoqda. Eng qonli hujumlardan biri Tir tumani tarkibidagi Barish aholi punktida sodir bo‘lib, uch qavatli turar joy binosiga berilgan zarba natijasida bir oilaning to‘rt a’zosi halok bo‘lgan.

 

Isroil harbiylari hujumlar Eron bilan ittifoqchi bo‘lgan Livandagi “Hizbulloh” guruhi tomonidan tunda uchirilgan raketa va snaryadlarga javoban amalga oshirilganini bildirdi.

 

Juma kuni “Hizbulloh” va Isroil o‘rtasida janglarning qayta avj olishi Shveysariyada o‘tkazilishi rejalashtirilgan AQSH–Eron muzokaralarining bekor qilinishiga sabab bo‘ldi. Mazkur uchrashuvlar shu hafta imzolangan muvaqqat kelishuvni Eron yadroviy dasturini ham qamrab oluvchi kengroq bitimga aylantirish jarayonini boshlashi kerak edi.

 

Mahalliy manbalarga ko‘ra, zo‘ravonliklar Isroilning to‘rt nafar harbiysi, jumladan bir yuqori martabali ofitser halok bo‘lgan hujumdan keyin kuchaygan. “Hizbulloh” bu hujum Isroil tomonidan avvalgi sulh shartlari buzilgach amalga oshirilganini da’vo qilmoqda.

 

Tomonlar sulhga tayyor ekanini bildirayotgan bo‘lsa-da, uning amalda kuchga kirgani hozircha rasman tasdiqlanmagan. “Hizbulloh” vakillari Isroil hujumlarni to‘xtatgan taqdirdagina sulhga rioya qilishlarini ma’lum qilgan.

 

Kuzatuvchilarga ko‘ra, Livandagi vaziyatning keskinlashuvi AQSH va Eron o‘rtasidagi diplomatik jarayonlarga ham salbiy ta’sir ko‘rsatmoqda. Mintaqadagi mojaro oqibatida minglab odamlar halok bo‘lgan, energiya narxlari keskin oshgan va global iqtisodiyot uchun qo‘shimcha xavflar yuzaga kelgan.