Britaniya bosh vaziri yaqin kunlarda iste’foga chiqishini e’lon qilishi mumkin
Bunga partiya ichidagi noroziliklar va siyosiy muvaffaqiyatsizliklar sabab bo‘lmoqda.
Buyuk Britaniya bosh vaziri Kir Starmer yaqin kunlarda iste’foga chiqish muddatlarini e’lon qilishi mumkin. Bu haqda Britaniya ommaviy axborot vositalariga tayanib, DW xabar berdi.
Ma’lum qilinishicha, Leyboristlar partiyasi ichida Starmerga bosim kuchayib bormoqda. Bunga bosh vazirning jamoatchilik orasidagi past reytingi hamda so‘nggi haftalarda yuz bergan siyosiy muvaffaqiyatsizliklar sabab bo‘layotgani aytilmoqda.
Xususan, 11-iyun kuni Buyuk Britaniya mudofaa vaziri Jon Hili iste’foga chiqdi. U hukumatni, jumladan bosh vazir va Moliya vazirligini mamlakat mudofaasi uchun yetarli mablag‘ ajratmayotganlikda tanqid qilgan.
Shuningdek, Meykerfild okrugida o‘tkazilgan parlamentga qo‘shimcha saylovlar natijalari ham Starmer pozitsiyasiga salbiy ta’sir ko‘rsatgani qayd etilmoqda. Saylovda Buyuk Manchester meri Endi Bernem Reform UK partiyasi nomzodini mag‘lub etib, ishonchli g‘alabaga erishgan.
BBC ta’kidlashicha, Leyboristlar partiyasining ayrim deputatlari Endi Bernemni partiyaning yangi yetakchisi sifatida ko‘rmoqda. U hozirda Starmerning ehtimoliy vorisi va kelajakdagi bosh vazirlikka asosiy da’vogar sifatida tilga olinmoqda.
Britaniya siyosiy doiralarida sobiq sog‘liqni saqlash vaziri Ues Striting nomzodi ham ehtimoliy yangi yetakchilar qatorida muhokama qilinmoqda.
