Saida Mirziyoyeva Qozog‘iston rasmiylari bilan hamkorlik masalalarini muhokama qildi
Saida Mirziyoyeva Ostona shahrida Qozog‘iston Prezidenti administratsiyasi rahbari Roman Sklyar va Davlat maslahatchisi Yerlan Karin bilan uchrashdi.
O‘zbekiston Prezidenti yordamchisi Saida Mirziyoyeva Ostona shahriga tashrifi doirasida Qozog‘iston rasmiylari bilan uchrashuvlar o‘tkazdi.
Mirziyoyevaning ma’lum qilishicha, Qozog‘iston Prezidenti administratsiyasi rahbari Roman Sklyar bilan bo‘lib o‘tgan muloqotda O‘zbekiston va Qozog‘iston o‘rtasidagi sheriklik munosabatlarining bugungi holati hamda ularni yanada rivojlantirish istiqbollari muhokama qilindi.
Tomonlar oliy darajada erishilgan kelishuvlarning izchil va to‘liq ijrosini ta’minlash maqsadida prezident administratsiyalari o‘rtasida yanada yaqin, tezkor va samarali hamkorlik mexanizmlarini yo‘lga qo‘yishga kelishib oldi.
Shuningdek, Saida Mirziyoyeva Qozog‘iston Davlat maslahatchisi Yerlan Karin bilan ham uchrashgan. Muzokaralarda ikki mamlakatning uzoq muddatli hamkorligining ustuvor yo‘nalishlari muhokama qilindi.
Xususan, muloqot davomida madaniy diplomatiyani rivojlantirish, yoshlarning ikki davlat o‘rtasidagi do‘stlik va hamjihatlikni mustahkamlashdagi o‘rni hamda yuqori texnologiyalar sohasidagi istiqbolli hamkorlik yo‘nalishlariga alohida e’tibor qaratildi.
