Shveysariyada Eron va AQSH o‘rtasidagi muzokaralar boshlanmoqda
Uchrashuv Livandagi harbiy harakatlar va Hormuz bo‘g‘ozi atrofidagi keskin vaziyat fonida o‘tkaziladi.
Shveysariyaning Burgenshtok kurortida Eron va AQSH delegatsiyalari o‘rtasida muzokaralar o‘tkazilishi rejalashtirilgan. Tomonlar vakillari uchrashuv o‘tkaziladigan hududga yetib kelgan. Bu haqda Bild xabar berdi.
Ma’lum qilinishicha, AQSH delegatsiyasi tarkibidan vitse-prezident Jey Di Vens, maxsus vakil Stiv Uitkoff hamda AQSH prezidenti Donald Trampning kuyovi Jared Kushner o‘rin olgan.
Eron tomoniga esa parlament spikeri Muhammad Bag‘ir G‘olibof va tashqi ishlar vaziri Abbos Aroqchi boshchilik qilmoqda.
Muzokaralar Livandagi harbiy harakatlar davom etayotgan hamda Hormuz bo‘g‘ozi atrofidagi vaziyat keskinlashgan bir paytda o‘tkazilmoqda. Avvalroq Eron Isroilning Livanga uyushtirgan zarbalarini sabab qilib, Hormuz bo‘g‘ozini yana yopayotganini ma’lum qilgan edi.
AQSH harbiylari esa bu da’volarni rad etib, bo‘g‘oz orqali kemalar harakati uzluksiz davom etayotganini bildirgan.
Ularning ma’lumotiga ko‘ra, hudud orqali 55 ta kema o‘tgan bo‘lib, ular orasida qariyb 17 million barrel neft tashigan kemalar ham bor.
Avvalroq Jey Di Vens muzokaralar doirasida Shveysariyada bir necha kun qolishni rejalashtirayotganini ma’lum qilgan edi.
Shveysariyada Eron va AQSH vakillari o‘rtasidagi muzokaralar boshlanmoqda. Uchrashuv Livandagi harbiy harakatlar va Hormuz bo‘g‘ozi atrofidagi keskin vaziyat fonida o‘tkaziladi.
Avvalroq 19-iyunga rejalashtirilgan muzokaralar bekor qilingan edi.
