Toshkentda itlar shafqatsizlarcha o‘ldirildi

Toshkent shahrining Mirzo Ulug‘bek tumanida itlarga nisbatan shafqatsizlik qilingani aks etgan video yuzasidan tergovga qadar tekshiruv olib borilmoqda. Bu haqda poytaxt IIBB matbuot xizmati xabar berdi.

 

Ijtimoiy tarmoqlarda 19-iyun kuni ko‘pqavatli uy yaqinidagi omborxona hududida bir necha erkakning itlarga nisbatan shafqatsiz munosabatda bo‘lib, ularni urib o‘ldirgani aks etgan videolar tarqalgandi. Mazkur holat jamoatchilik orasida turli muhokamalarga sabab bo‘ldi.

 

Hududda faoliyat yurituvchi tadbirkor Yevgeniy Rojkovning ma’lum qilishicha, so‘nggi vaqtlarda yaqin atrofdagi qurilishlar yakunlangach, hududdagi daydi itlar soni sezilarli darajada ko‘paygan. Shu sababli u avval ham ishlagan veterinarga murojaat qilib, hududni burgalarga qarshi ishlov berish hamda ahvoli og‘ir bo‘lgan itlarni ko‘rikdan o‘tkazishni so‘ragan.

 

Tadbirkorning ta’kidlashicha, veterinarning dastlabki harakatlari videolarda ham aks etgan bo‘lib, u itlarga ukol qilgan va hududda zararsizlantirish ishlarini olib borgan. Biroq keyinchalik ayrim itlarga nisbatan shafqatsiz munosabatda bo‘lgani aniqlangan.

 

“Ekolog” jamoat tashkiloti direktori o‘rinbosari Guli Ergasheva veterinarning harakatlari amaldagi qonunchilik talablariga va hayvonlarga nisbatan insonparvar munosabat tamoyillariga zid ekanini bildirib, itlar shafqatsizlarcha o‘ldirilganini qayd etdi.

 

IIBB ma’lumotiga ko‘ra, videolarda aks etgan shaxslarning kimligi aniqlangan. Ulardan tushuntirish xatlari va ko‘rsatmalar olingan. Hozirda holat yuzasidan tergovga qadar tekshiruv ishlari davom etmoqda. Yakuniy xulosaga ko‘ra qonuniy qaror qabul qilinishi ta’minlanadi.

 

Eslatib o‘tamiz, O‘zbekistonda joriy yil 25-martdan boshlab hayvonlarga nisbatan shafqatsiz munosabat uchun javobgarlik kuchaytirilgan. Qonunchilikka ko‘ra, bunday huquqbuzarlik sodir etgan shaxslarga 15 dan 25 BHMgacha miqdorda jarima (taxminan 6,1 mln so‘mdan 10,3 mln so‘mgacha) yoki 15 sutkagacha ma’muriy qamoq jazosi belgilangan.