23-iyun futbol o‘yini munosabati bilan Toshkent metrosi ish vaqti uzaytiriladi
Muxlislar oqimi oshishi sabab metroda qo‘shimcha ish rejimi joriy etildi.
Ma’lumki, futbol bo‘yicha O‘zbekiston milliy terma jamoasi Jahon chempionati doirasidagi navbatdagi muhim uchrashuvini 23-iyun kuni soat 22:00 da o‘tkazadi.
Mazkur o‘yin munosabati bilan poytaxtning turli hududlarida futbol ixlosmandlarining harakati sezilarli darajada oshishi kutilmoqda. Yo‘lovchilarga qo‘shimcha qulaylik yaratish hamda jamoat transporti xizmatlarining uzluksizligini ta’minlash maqsadida “Toshkent metropoliteni” DUK tomonidan metro poyezdlari harakati vaqti qo‘shimcha 1 soatga uzaytiriladi.
Shunga ko‘ra, 23-iyun kuni metro yo‘lovchilarga tungi soat 01:00 ga qadar xizmat ko‘rsatadi. Ushbu qo‘shimcha ish rejimi muxlislarning o‘yindan so‘ng o‘z manzillariga xavfsiz, qulay va tezkor yetib borishlarini ta’minlashga xizmat qiladi.
