Eron-AQSh muzokaralarining birinchi bosqichi yakunlandi - nimaga kelishib olindi?
Tomonlar o‘rtasidagi texnik muzokaralar hafta oxirigacha davom etadi.
Shveytsariyaning Byurgenstok shahrida Qatar va Pokiston vositachiligida o‘tkazilgan AQSh hamda Eron vakillari o‘rtasidagi yuqori darajadagi muzokaralarning birinchi bosqichi yakunlandi.
Qatar Tashqi ishlar vazirligi ma’lumotiga ko‘ra, tomonlar 60 kun ichida yakuniy kelishuvga erishish bo‘yicha yo‘l xaritasini ishlab chiqishga kelishib olgan. Shuningdek, vositachilik jarayonlarini muvofiqlashtirish bo‘yicha qo‘mita tuzish, Livandagi harbiy harakatlarni to‘xtatish yuzasidan Bayrut ishtirokidagi alohida guruh tashkil etish hamda Hormuz bo‘g‘ozi orqali tijorat kemalarining xavfsiz harakatini ta’minlash uchun aloqa mexanizmini yaratish bo‘yicha kelishuvlarga erishilgan.
Ma’lum qilinishicha, barcha masalalar yuzasidan texnik muzokaralar hafta oxirigacha davom etadi.
Eron tashqi ishlar vaziri Abbos Aroqchi Qatar va Pokiston vositachiligidagi sa’y-harakatlar natijasida Eron nefti va neft-kimyo mahsulotlari eksportiga qo‘yilgan ayrim cheklovlar bekor qilingani, qator aktivlar muzlatilgan holatdan chiqarilgani hamda mamlakatni tiklash va rivojlantirish bo‘yicha keng qamrovli dastur ishga tushirilganini ma’lum qilgan.
Avvalroq AQSh va Eron urushni to‘xtatish hamda Hormuz bo‘g‘ozi orqali kemalar harakatini tiklashga qaratilgan o‘zaro anglashuv memorandumini elektron shaklda imzolagani va hujjat kuchga kirgani xabar qilingan edi.
