Janubiy Koreyaning sobiq adliya vaziri 25 yilga qamaldi
Vazir davlat to'ntarishini uyushtirishda muhim rol o'ynaganlikda aybdor deb topilgan.
Janubiy Koreyaning sobiq adliya vaziri Pak Son Je davlat to‘ntarishiga urinishda ishtirok etgani uchun 25 yil muddatga ozodlikdan mahrum etildi. Bu haqda “Yonhap” axborot agentligi xabar berdi.
Sud qaroriga ko‘ra, u 2024-yil 3-dekabrda harbiy holat joriy etishga urinish bilan bog‘liq voqealarda ishtirok etgan va isyon deb tasniflangan harakatlarni tayyorlash hamda amalga oshirishda muhim rol o‘ynagan.
Shuningdek, sobiq vazir mansab vakolatini suiiste’mol qilishda ham aybdor deb topilgan.
Prokuratura tomonidan unga nisbatan 20 yil qamoq jazosi so‘ralgan bo‘lsa-da, sud 25 yil muddatni belgilagan.
Eslatib o‘tamiz, 2024-yil dekabr voqealari bilan bog‘liq ish doirasida Janubiy Koreyaning sobiq prezidenti Yun Sok Yol ham ayblanib, keyinchalik umrbod qamoq jazosiga hukm qilingan.
3-dekabr kuni e’lon qilingan harbiy holat farmoni Milliy Assambleya tomonidan bekor qilinganidan so‘ng voqealar keskin siyosiy inqirozga sabab bo‘lgan. 2025-yil 4-aprelda Konstitutsiyaviy sud impichmentni tasdiqlagan.
Muddatidan oldingi saylovlarda esa muxolifatdagi Demokratik partiya nomzodi Li Chje Myon g‘alaba qozonib, 2025-yil 4-iyundan davlat rahbari lavozimini egallagan.
