MB mijozlardan eng ko‘p shikoyat tushgan 10 ta bankni e’lon qildi

Markaziy bank 2026-yil I choragi yakunlari bo‘yicha murojaatlar bo‘yicha eng salbiy ko‘rsatkich qayd etilgan 10 ta bank reytingini e’lon qildi. Reytingdan o‘rin olgan banklarning yarmi davlatga qarashli.

 

Reytingda mijozlardan eng ko‘p shikoyat tushgan bank sifatida “Biznesni rivojlantirish banki" qayd etilgan. Undan keyingi o‘rinlarni “Anorbank”, “Mikrokreditbank”, “AVO bank” va “TBC bank” egallagan.

 

Shuningdek, ro‘yxatdan quyidagi banklar ham o‘rin olgan:

 

• “Davr bank”;
• “Tenge bank”;
• “Asaka bank”;
• “Turon bank”;
• “Agrobank”.

 

 

Regulyator ma’lum qilishicha, reyting iste’molchilar huquqlarini himoya qilish va bank xizmatlari sifatini oshirish maqsadida tuzilgan. Ro‘yxat Markaziy bank va boshqa davlat idoralariga banklar faoliyati yuzasidan kelib tushgan murojaatlar asosida shakllantiriladi.

 

Qayd etilishicha, mijozlar soniga nisbatan murojaatlar ulushining yuqori bo‘lishi bank mahsulotlari va xizmatlari bo‘yicha mijozlarga yetarli tushuntirish berilmasligi, murojaatlarga o‘z vaqtida va sifatli javob taqdim etilmasligi, takroriy shikoyatlarga sabab bo‘layotgan tizimli kamchiliklarning saqlanib qolishi, masofaviy xizmatlar, to‘lovlar, kreditlar va boshqa bank operatsiyalari bilan bog‘liq muammolarning o‘z vaqtida hal etilmasligi hamda iste’molchilar huquqlari va qonuniy manfaatlarini himoya qilish bo‘yicha ichki nazorat mexanizmlarini yanada takomillashtirish zarurligini ko‘rsatadi.

 

Markaziy bank mazkur banklarga murojaatlar kelib chiqish sabablarini chuqur tahlil qilishni va takroriy shikoyatlarga olib kelayotgan omillarni bartaraf etishni tavsiya qilgan. 

 

Shuningdek, murojaatlarni ko‘rib chiqish jarayonlarini takomillashtirish, mijozlarga xizmat ko‘rsatish sifati va ichki nazorat mexanizmlarini kuchaytirish zarurligi ko‘rsatilgan. Shu bilan birga, iste’molchilar huquqlarini himoya qilishga qaratilgan profilaktik choralarni kengaytirish tavsiya etilgan.

 

Markaziy bankga ko‘ra, mazkur indeks bankning moliyaviy barqarorligi yoki ishonchliligini baholamaydi. U faqat mijozlar soniga nisbatan kelib tushgan murojaatlar ulushini aks ettiradi. Chorak davomida 100 tadan kam murojaat kelib tushgan banklar bo‘yicha indeks hisoblanmaydi.

 

Avvalroq bankomatda naqd pul yechishdagi uzilishlar, nosozliklar uchun banklar jarimaga tortilishi haqida xabar berilgandi.