O‘zbekistonda 464 ta “zapravka” faoliyati vaqtincha to‘xtatildi

 

O‘zbekistonda yonilg‘i quyish shoxobchalari va gaz to‘ldirish inshootlarida xavfsizlik talablariga rioya etilishi holati bo‘yicha o‘tkazilgan keng qamrovli xatlov yakunida 464 ta shoxobcha faoliyati vaqtincha to‘xtatildi. Bu haqda 22-iyundan kuchga kirgan Vazirlar Mahkamasining qarorida ma’lum qilindi.

 

Qarorga ko‘ra, respublika bo‘ylab faoliyat yuritayotgan 6 196 ta suyultirilgan va siqilgan gaz, neft mahsulotlari quyish shoxobchalari hamda gaz ballonlariga suyultirilgan gaz to‘ldirish stansiya va punktlari tekshiruvdan o‘tkazilgan. Xatlov davomida avariya va noxush hodisalarning oldini olish, insonlar xavfsizligini ta’minlash hamda mehnat muhofazasi talablariga rioya etilishi holati o‘rganilgan.

 

Tekshiruvlar natijasida jami 46 ming 737 ta qoidabuzarlik va kamchilik aniqlangan. Shundan 2 218 tasi qurilish, 7 949 tasi yong‘in xavfsizligi, 25 341 tasi sanoat va texnika xavfsizligi, 3 354 tasi texnik jihatdan tartibga solish hamda 7 875 tasi texnologik jarayonlarga oid kamchiliklarni tashkil etgan.

 

Xatlov jarayonida 7 ming 166 ta kamchilik joyida bartaraf etilgan bo‘lsa, xavfsizlik talablariga javob bermagan 464 ta yonilg‘i quyish shoxobchasi faoliyati vaqtincha to‘xtatilgan.

 

Shuningdek, 2026-yil 1-sentyabrdan boshlab barcha turdagi yonilg‘i quyish shoxobchalari va gaz to‘ldirish inshootlarida xizmat muddati tugagan yoki ishlab chiqarilgan sanasi noma’lum bo‘lgan, ortiqcha bosim ostida ishlovchi uskunalardan foydalanish 2030-yil 1-yanvargacha cheklanadi.

 

Bundan tashqari, 2026-yil sentabriga qadar insonlar hayoti va sog‘lig‘iga xavf tug‘diruvchi, yong‘in va sanoat xavfsizligi hamda shaharsozlik me’yorlariga javob bermaydigan obyektlar reyestri shakllantirilib, ularni bosqichma-bosqich xavfsiz hududlarga ko‘chirish bo‘yicha chora-tadbirlar ishlab chiqiladi.

 

Eslatib o‘tamiz, avvalroq Qarshi shahridagi yoqilg‘i quyish shoxobchasida sodir bo‘lgan portlash oqibatida 6 kishi halok bo‘lgandi.