“Ular buni his qilishi kerak” — Zelenskiy Rossiyani yangi zarbalar bilan ogohlantirdi
Ukraina prezidenti dronlari 2000 kilometrdan ortiq masofadagi nishonlarga zarba bera olishini ma’lum qildi.
Ukraina prezidenti Vladimir Zelenskiy Rossiyaning kundalik hujumlariga javoban Rossiya hududidagi nishonlarga berilayotgan zarbalar kuchaytirilishini ma’lum qildi.
Davlat rahbari jurnalist Alla Mazurga bergan intervyusida urush oqibatlari Rossiya jamiyati tomonidan ham his qilinishi kerakligini ta’kidlab, “Ular buni his qilishi kerak”, deya bayonot bergan.
Zelenskiyning so‘zlariga ko‘ra, Ukraina mudofaa-sanoat kompleksining rivojlanishi va uzoq masofali qurollar ishlab chiqarish hajmining oshishi mamlakat imkoniyatlarini sezilarli darajada kengaytirgan.
Prezident Tyumen viloyatidagi nishonga berilgan zarba haqida ham ma’lumot berib, nishongacha bo‘lgan masofa taxminan 2070 kilometrni tashkil etganini bildirgan. Uning qayd etishicha, hujumda yangi avlod “Fire Point” dronlari qo‘llanilgan bo‘lib, ular 2500 kilometrdan ortiq masofani bosib o‘tishga qodir.
Zelenskiy Ukraina Rossiyaning harbiy zavodlari, neft bazalari, gaz omborlari va boshqa strategik obyektlari joylashuvi haqida ma’lumotga ega ekanini ta’kidlab, uzoq masofali qurollarni takomillashtirish ishlari davom ettirilayotganini ma’lum qilgan.
Uning so‘zlariga ko‘ra, bunday zarbalar Rossiya tajovuziga javob hamda adolatni tiklashning bir qismi hisoblanadi.
