Urgutda 27,4 ming dollarlik “gashish” savdosi fosh etildi
2 kg 80 gramm “gashish”ni sotishga uringan uch nafar fuqaro ashyoviy dalillar bilan ushlangan.
Davlat xavfsizlik xizmati hamda Ichki ishlar organlari xodimlari hamkorligida Samarqand viloyatida o‘tkazilgan tezkor tadbir davomida giyohvandlik vositalari savdosi bilan shug‘ullanib kelgan shaxslar qo‘lga olindi. Bu haqda DXX Zamo.uz'ga xabar berdi.
Aniqlanishicha, Urgut tumanida yashovchi 1990, 1998 va 2008-yillarda tug‘ilgan uch nafar fuqaro 2 kilogramm 80 gramm “gashish” moddasini shartli xaridorga 27,4 ming AQSH dollariga sotayotgan vaqtida ashyoviy dalillar bilan ushlangan.
Qayd etilishicha, qo‘lga olingan shaxslardan biri avval ham giyohvandlik vositalari savdosi bilan bog‘liq jinoyat sodir etgani uchun sudlangan.
Mazkur holat yuzasidan jinoyat ishi qo‘zg‘atilib, tergov harakatlari olib borilmoqda.
Amaldagi qonunchilikka muvofiq, bunday turdagi jinoyatlar uchun 20 yilgacha ozodlikdan mahrum qilish jazosi nazarda tutilgan.
