Eron va AQSh muzokaralaridan so‘ng to‘rtta ishchi guruh tuzildi
Tuzilgan guruhlar sanksiyalarni bekor qilish, yadroviy kelishuvlar, iqtisodiy tiklanish hamda kelishuvlar ijrosini monitoring qilish yo‘nalishlarini qamrab oladi.
Eron va Qo‘shma Shtatlar o‘rtasidagi muzokaralardan so‘ng sanksiyalarni bekor qilish, yadroviy kelishuvlar, iqtisodiy tiklanish hamda monitoring masalalari bo‘yicha to‘rtta ishchi guruh tuzildi.
Bu haqda Eron tashqi ishlar vaziri o‘rinbosari Kazem G‘aribobodiy Shveytsariyaning Byurgenstok shahrida o‘tkazilgan to‘rt tomonlama maslahatlashuvlardan so‘ng Press TV telekanaliga ma’lum qildi.
Uning so‘zlariga ko‘ra, tuzilgan ishchi guruhlar sanksiyalarni yumshatish, yadroviy tartibga solish, iqtisodiy tiklanish va qayta qurish hamda kelishuvlar ijrosini monitoring qilish yo‘nalishlarini qamrab oladi.
Shuningdek, tomonlar Hormuz bo‘g‘ozi orqali yuk tashish masalalarini muvofiqlashtirish uchun maxsus aloqa punktini tashkil etishga kelishib olgan.
21-iyun kuni Byurgenstokda Qatar va Pokiston vositachiligida o‘tgan AQSh–Eron muzokaralarining birinchi bosqichi ijobiy va konstruktiv muhitda o‘tgan. Qo‘shma bayonotga ko‘ra, uchrashuvda texnik muzokaralar uchun muhim poydevor yaratilgan.
