JCH-2026. Argentina Avstriyani magʻlub etib, muddatidan avval keyingi bosqich yoʻllanmasini naqd qildi
Uchrashuvda dubl muallifi boʻlgan Lionel Messi mundiallar tarixidagi eng yaxshi toʻpurarga aylanib oldi.
2026 yilgi Jahon chempionatining J guruhi 2-turidan o‘rin olgan markaziy uchrashuvda amaldagi jahon chempioni Argentina Avstriyani 2:0 hisobida mag‘lub etdi.
Arlington shahrida bo‘lib o‘tgan bahs qahramoni Lionel Messi bo‘ldi. Uchrashuvning 9-daqiqasida argentinaliklar sardori penaltidan foydalana olmagan bo‘lsa-da, keyinchalik o‘z so‘zini aytdi. Messi 38-daqiqada hisobni ochib, jamoasini oldinga olib chiqdi.
Ikkinchi bo‘limda Avstriya hisobni tenglashtirish uchun bir qator urinishlar amalga oshirdi, biroq Argentina himoyasi ishonchli harakat qildi. Uchrashuvga qo‘shib berilgan daqiqalarda esa Messi yana bir bor raqib darvozasini ishg‘ol qilib, yakuniy hisobni o‘rnatdi — 2:0.
Mazkur dubl Lionel Messi uchun alohida ahamiyat kasb etdi. 38 yoshli futbolchi Jahon chempionatlari tarixidagi gollari sonini 18 taga yetkazib, germaniyalik afsonaviy hujumchi Miroslav Klozening 16 gollik rekordini ortda qoldirdi va mundiallar tarixining eng sermahsul to‘purari sifatida yangi rekord o‘rnatdi.
Ushbu g‘alaba evaziga Argentina hisobidagi ochkolar sonini 6 taga yetkazdi va muddatidan avval pley-off bosqichi yo‘llanmasini qo‘lga kiritdi. Amaldagi jahon chempionlari guruhdagi so‘nggi tur oldidan keyingi bosqich masalasini hal qilib ulgurdi.
J guruhining ikkinchi uchrashuvida Iordaniya va Jazoir o‘zaro bahs olib boradi.
