Namanganda goʻsht yetishtirish hajmi oshiriladi

 

Prezident Shavkat Mirziyoyev To‘raqo‘rg‘on tumanida joylashgan “Namangan qo‘ychilik klasteri” faoliyati bilan tanishdi.

 

Mazkur loyiha O‘zbekiston Prezidentining 2020-yil 29-yanvardagi “Chorvachilik tarmog‘ini davlat tomonidan qo‘llab-quvvatlashning qo‘shimcha chora-tadbirlari to‘g‘risida”gi qarori asosida amalga oshirilgan.

 

Umumiy qiymati 35 million dollar bo‘lgan klaster 10 gektar yer maydonida uch bosqichda tashkil etilmoqda.

 

Birinchi bosqichda xorijdan 15 ming bosh nasldor qo‘y olib kelinadi. Ikkinchi bosqich yakunida chorva sonini yana 35 ming boshga yetkazish rejalashtirilgan. Loyiha doirasida yuqori mahsuldor “Arashan”, “Hisor” va “Adelbay” zotlarini mahalliy sharoitga moslashtirish ko‘zda tutilgan.

 

Zamonaviy parvarish texnologiyalari va ilmiy yondashuv asosida go‘sht yetishtirish hajmi va sifatini oshirish maqsad qilingan. Texnologik hisob-kitoblarga ko‘ra, 40–50 kilogramm vazndagi qo‘ylarni intensiv boqish orqali ularning vazni uch oyda 100 kilogrammgacha yetkaziladi. Natijada har bir bosh qo‘ydan 60–70 kilogrammgacha sof go‘sht olish imkoniyati yaratiladi.

 

Loyiha to‘liq quvvatga chiqqach, viloyatda yiliga 35–40 ming tonna sifatli go‘sht mahsulotlari ishlab chiqarilishi kutilmoqda. Shu bilan birga, 280 ta doimiy ish o‘rni yaratiladi hamda 95 ta kam ta’minlangan oila vakillarining bandligi ta’minlanadi.

 

Majmua tarkibida zamonaviy logistika xizmatlari, veterinariya va servis shoxobchalari, shuningdek, mahsulotlarni to‘g‘ridan-to‘g‘ri sotish uchun savdo nuqtalari ham tashkil etiladi. Bu esa uzluksiz klaster tizimini shakllantirishga xizmat qiladi.

 

Prezident ushbu loyiha tajribasini chorvachilik tarmog‘ini rivojlantirish, ichki bozorni sifatli go‘sht mahsulotlari bilan ta’minlash hamda aholi bandligini oshirishda muhim ahamiyatga ega ekanini ta’kidlab, uni keng ommalashtirish bo‘yicha mutasaddilarga topshiriqlar berdi.