Yomg‘irda xizmat qilayotgan YPX xodimiga soyabon bergan haydovchi rag‘batlantirildi
Haydovchi YPX xodimiga ko‘rsatgan yordami ortida shaxsiy manfaat bo‘lmaganini bildirgan.
Avvalroq ijtimoiy tarmoqlarda yomg‘irli ob-havo sharoitida xizmat olib borayotgan yo‘l-patrul xizmati xodimiga haydovchilardan biri tomonidan soyabon olib borib berilgani aks etgan video tarqalgan edi.
Mazkur holatga befarq bo‘lmagan, xizmat vazifasini bajarayotgan xodimga insoniylik nuqtai nazaridan yordam ko‘rsatgan fuqaro Ichki ishlar vazirligi Jamoat xavfsizligi departamenti Yo‘l harakati xavfsizligi xizmati tomonidan rag‘batlantirildi. Bu haqda YHXX Axborot xizmati rahbari Zoyir Yo'ldoshov ma'lum qildi.
Taqdirlash marosimida haydovchi yo‘l-patrul xizmati xodimini tanimasligini, o‘rtada hech qanday qoidabuzarlik yoki manfaatdorlik bo‘lmaganini ta’kidlagan.
“Shunchaki insoniylik nuqtai nazaridan yordam bermoqchi bo‘ldim. Biz ichki ishlar organlari xodimlarining mehnatini qadrlaymiz va hurmat qilamiz. Har kim ham bu mas’uliyatli kasb egasi bo‘la olmaydi. Yaxshiyam, sizlar borsizlar. Hamisha yuzingiz yorug‘ bo‘lsin”, — degan haydovchi.
Yo‘l harakati xavfsizligi xizmati tomonidan fuqaroga esdalik sovg‘asi sifatida soyabon topshirilgan.
