Koreyaga ishga yuborishni va’da qilgan firibgarlar aniqlandi

Bosh prokuratura huzuridagi Departamentning hududiy bo‘linmalari tomonidan o‘tkazilgan tekshiruvlarda fuqarolarni Janubiy Koreyaga ishga yuborishni va’da qilib, ulardan katta miqdorda pul undirgan bir qator shaxslarning noqonuniy harakatlari fosh etildi.

 

Aniqlanishicha, Toshkent viloyatida fuqaro T.T. 12 nafar fuqaroning ishonchiga kirib, ularni Koreyaga ishga jo‘natishni va’da qilgan hamda 38 ming AQSH dollarini qo‘lga kiritgan. Tergov materiallariga ko‘ra, ushbu mablag‘lar avval Migratsiya agentligida ishlagan, firibgarlik va pora berish bilan bog‘liq jinoyatlar uchun sudlangan A.A.ga berilgan.

 

Marg‘ilonda o‘tkazilgan tekshiruvda esa muqaddam sudlangan fuqaro I.R. ikki nafar fuqaroni Koreyaga ishga yuborishni va’da qilib, ulardan jami 3,5 ming AQSH dollarini olgani aniqlangan. Mazkur mablag‘ning 3 million so‘mi jabrlanuvchilarga qaytarilgan.

 

Qashqadaryo viloyatining Dehqonobod tumanida fuqarolar I.X. va A.K. Migratsiya agentligida ishlovchi tanishlari orqali bir fuqaroni Koreyaga ishga yuborishni va’da qilib, undan 2 ming AQSH dollari va 36 million so‘m olganlikda gumon qilinmoqda.

 

Xonobod shahrida muqaddam firibgarlik uchun sudlangan A.A. uch nafar fuqaroga Koreya vizasini olib berishni va’da qilib, 2,5 ming AQSH dollari va 11 million so‘mni qo‘lga kiritgani aniqlangan. Tergov davomida ushbu mablag‘ning 1 ming AQSH dollari qaytarilgan.

 

Jizzax viloyatining Do‘stlik tumanida muqaddam sudlangan fuqaro Y.L. bir fuqaroni Koreyaga ishga yuborishni va’da qilib, 11 ming AQSH dollari evaziga kelishgan va shundan 2,3 ming AQSH dollarini olgan.

 

Xorazm viloyatining Bog‘ot tumanida esa fuqaro X.K. Koreyada ishlash uchun topshiriladigan imtihondan ijobiy natija bilan o‘tkazib berishni va’da qilib, 3,5 ming AQSH dollaridan 1 ming AQSH dollarini olgani aniqlangan.

 

Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.