“Odamlar turmushini yaxshilashga qaratilgan o‘zgarishlar cho‘zilmasligi kerak” — Saida Mirziyoyeva
Andijon viloyatidagi bir qator ijtimoiy obyektlar, jumladan, Oltinko‘ldagi “Ko‘makay” oilaviy poliklinikasi, 9-sonli bog‘cha va 36-sonli maktab yangilanadi.
Saida Mirziyoyeva Andijon viloyatiga tashrifi davomida zudlik bilan yangilanishi talab etilayotgan qator ijtimoiy obyektlarni ko‘zdan kechirdi.
Jumladan, Oltinko‘l tumanidagi “Ko‘makay” oilaviy poliklinikasi binosi o‘rganildi. Mazkur muassasa 1988-yildan buyon foydalanib kelinayotgani va bugungi talab hamda standartlarga javob bermasligi qayd etildi.
Shuningdek, 9-sonli bog‘cha hamda 36-sonli maktab faoliyati bilan tanishildi. Ma’lum qilinishicha, bog‘cha 1970-yillarda qurilgan sobiq oromgoh hududida joylashgan, 36-sonli maktab esa 1960-yilda barpo etilgan bo‘lib, uning sig‘imi o‘quvchilar soniga mos kelmaydi. Har ikki obyektni yangidan qurish rejalashtirilgan.
Saida Mirziyoyeva ta’lim va tibbiyot sohasida shifokorlar hamda pedagoglar uchun munosib mehnat sharoitlarini yaratish, ota-onalarning farzandlarini maktab va bog‘chalarga ishonch bilan yuborishi uchun zarur infratuzilmani shakllantirish ustuvor vazifa ekanini ta’kidladi.
"Odamlar turmushini yaxshilashga qaratilgan o‘zgarishlar o‘n yillab cho‘zilmasligi kerak. Jarayonni tezlashtirish, aniq va sezilarli natija tez fursatda amalda ko‘rinishi lozim", deya yozdi Saida Mirziyoyeva.
