Putin Ukraina bilan muzokaralarga tayyorligini ma’lum qildi

Rossiya Prezidenti Vladimir Putin Ukraina bilan tinchlik muzokaralarini davom ettirishga tayyor ekanini ma’lum qildi. Biroq u muzokaralar avval ilgari surilgan shartlar va erishilgan kelishuvlar asosida olib borilishi kerakligini ta’kidlagan.

 

Putinning aytishicha, Rossiya tomoni 2022-yil bahorida Istanbulda bo‘lib o‘tgan muzokaralarda shakllangan kelishuvlarni muzokaralar uchun asos sifatida ko‘rmoqda. U o‘sha paytda Ukraina delegatsiyasi tomonidan dastlabki hujjatlar ma’qullanganini eslatib, mazkur yondashuvdan voz kechish uchun sabab ko‘rmayotganini bildirgan.

 

Rossiya rahbari, shuningdek, Donald Tramp bilan Ankorijda bo‘lib o‘tgan uchrashuvda muhokama qilingan masalalar ham kelgusidagi muloqotlarda inobatga olinishi kerakligini qayd etgan.

 

Ma’lum qilinishicha, Moskva ilgari surayotgan asosiy shartlardan biri Ukraina qo‘shinlarining Donetsk, Lugansk, Zaporijjya va Xerson viloyatlaridan chiqib ketishini nazarda tutadi. Rossiya tomoni ushbu hududlarni muzokaralar jarayonidagi muhim masalalardan biri sifatida ko‘rmoqda.

 

Putin hukumat a’zolari bilan uchrashuvda so‘zlar ekan, muzokaralar joylardagi amaldagi vaziyat hamda avval erishilgan kelishuvlar asosida davom etishi lozimligini ta’kidlagan.

 

Eslatib o‘tamiz, Rossiya va Ukraina delegatsiyalari o‘rtasidagi so‘nggi muzokaralar AQSh vositachiligida Abu-Dabida bo‘lib o‘tgan. Shuningdek, Turkiya tomoni ikki davlat o‘rtasidagi navbatdagi uchrashuvlarga mezbonlik qilishga tayyor ekanini bildirgan.