Qirgʻiziston parlamenti prezidentlik saylovlari sanasini tasdiqladi
Prezident tashabbusi bilan prezidentlik saylovlarini oʻtkazish tartibi va muddatlari qayta belgilandi.
Qirgʻiziston Jogorku Keneshi mamlakat prezidenti va parlament deputatlari saylovlari toʻgʻrisidagi konstitutsiyaviy qonunga kiritilayotgan oʻzgartirishlarni uch oʻqishda maʼqulladi. Mazkur tashabbus prezident tomonidan ilgari surilgan boʻlib, keyingi prezidentlik saylovlarini oʻtkazish tartibi va muddatlarini aniqlashtirishni nazarda tutadi. Bu haqda inbusiness.kz xabar berdi.
Qirgʻiziston Markaziy saylov komissiyasi raisi Tinchtyk Shaynazarovning maʼlum qilishicha, oʻzgartirishlar amaldagi qonunchilikni Konstitutsiya talablariga moslashtirish hamda saylov sanasini aniq belgilashga qaratilgan. Yangi tartibga koʻra, prezidentlik saylovlari yanvar oyining toʻrtinchi yakshanbasida oʻtkaziladi va ovoz berish sanasi kamida toʻrt oy oldin eʼlon qilinadi.
Shunga muvofiq, Qirgʻizistonda navbatdagi prezidentlik saylovlari 2027-yil 24-yanvar kuni oʻtkazilishi rejalashtirilmoqda. Parlamentdagi muhokamalar davomida haftaning kuni boʻyicha ayrim texnik oʻzgartirishlar sabab 27-yanvar sanasi ham tilga olindi.
Jogorku Kenesh spikeri Marlen Mamatalievning taʼkidlashicha, mazkur oʻzgartirishlar saylovchilarning faolligini oshirish va ovoz berish jarayonida yuqori ishtirokni taʼminlashga xizmat qiladi.
Qonun loyihasi endilikda imzolash uchun Qirgʻiziston prezidentiga yuboriladi va rasmiy eʼlon qilingach kuchga kiradi.
