Raqobat qo‘mitasi dori vositalari reklamalaridagi chalg‘ituvchi iboralardan ogohlantirdi
Ayrim dori vositalari reklamalarida “eng samarali”, “eng xavfsiz”, “kafolatlangan natija” yoki “nojo‘ya ta’sirlari mavjud emas” kabi iste’molchilarni chalg‘itishi mumkin bo‘lgan iboralar qo‘llanmoqda.
Raqobat qo‘mitasi so‘nggi paytlarda ommaviy axborot vositalari, ijtimoiy tarmoqlar va messenjerlarda dori vositalari reklamalarida iste’molchilarni chalg‘ituvchi yoki chalg‘itishi mumkin bo‘lgan bo‘rttirilgan iboralar qo‘llanayotganiga e’tibor qaratdi.
Qayd etilishicha, ayrim reklamalarda dori vositalari “noyob”, “eng samarali”, “eng xavfsiz”, “kafolatlangan natija”, “eng ishonchli vosita”, “tez davolaydi”, “nojo‘ya ta’sirlari mavjud emas” yoki “samarasi isbotlangan” kabi ta’riflar bilan targ‘ib qilinmoqda.
Qo‘mita bunday ma’lumotlar iste’molchilarda dori vositalarining xususiyatlari haqida noto‘g‘ri tasavvur uyg‘otishi, shifokor tavsiyasisiz o‘zini-o‘zi davolashga undashi hamda salomatlik uchun salbiy oqibatlarga olib kelishi mumkinligini ta’kidladi.
“Reklama to‘g‘risida”gi qonunning 34-moddasiga muvofiq, dori vositalari reklamalarida mustaqil davolanish mumkinligi haqida taassurot uyg‘otish, olimlar, tibbiyot xodimlari yoki mashhur shaxslarning tavsiyalaridan foydalanish, alohida shaxslarning minnatdorlik izhorlari va muvaffaqiyatli davolanish holatlarini keltirish, preparatni eng samarali, eng xavfsiz yoki noyob vosita sifatida taqdim etish, ta’siri kafolatlanganini da’vo qilish hamda boshqa dori vositalari bilan noto‘g‘ri taqqoslashlar qilish taqiqlanadi.
Shuningdek, retseptsiz beriladigan dori vositalari reklamalarida qo‘llash bo‘yicha qarshi ko‘rsatmalar mavjudligi va mutaxassis maslahatini olish zarurligi haqidagi ogohlantirish ham bo‘lishi shart.
Raqobat qo‘mitasi reklama beruvchilar va reklama tarqatuvchilarni qonunchilik talablariga qat’iy rioya qilishga, fuqarolarni esa dori vositalarini tanlashda faqat reklama emas, balki shifokor tavsiyalariga tayanishga chaqirdi.
