Toshkentda qalbaki 10 ming dollarni 6,5 ming dollarga sotayotgan shaxs ushlandi
Tezkor tadbir davomida qalbaki valyutalar musodara qilingan.
Bosh prokuratura huzuridagi Departamentning Toshkent shahar boshqarmasi hamda boshqa huquqni muhofaza qiluvchi organlar xodimlari hamkorligida o‘tkazilgan tezkor tadbir davomida qalbaki AQSH dollarlarini muomalaga kiritishga uringan shaxs qo‘lga olindi. Bu haqda Departament matbuot xizmati xabar berdi.
Aniqlanishicha, fuqaro A.A. 100 dollarlik kupyuralardagi qalbaki 10 ming AQSH dollarini fuqaro R. Z. ga 6,5 ming AQSH dollariga sotayotgan vaqtida ashyoviy dalillar bilan ushlangan. Tezkor tadbir davomida qalbaki valyutalar musodara qilingan.
Mazkur holat yuzasidan Jinoyat kodeksining 176-moddasi — qalbaki pul, aktsiz markasi yoki qimmatli qog‘ozlar yasash hamda ularni o‘tkazish bilan bog‘liq jinoyat alomatlari bo‘yicha jinoyat ishi qo‘zg‘atilib, tergov harakatlari olib borilmoqda.
Eslatib o‘tamiz, avvalroq Namangan viloyatida ham qalbaki 100 ming AQSH dollarini 40 ming dollarga sotishga uringan shaxslar huquqni muhofaza qiluvchi organlar tomonidan qo‘lga olinib, ularga nisbatan tegishli tartibda jinoyat ishi qo‘zg‘atilgani haqida xabar qilingandi.
