Samarqandda mahalla ichida 130 km/soat tezlikda mashina haydagan yigit jazolandi
Tekshiruv davomida avtomobilni boshqargan shaxsda haydovchilik guvohnomasi yo'qligi aniqlangan.
Samarqand viloyatining Urgut tumanida haydovchilik huquqiga ega bo‘lmagan yigit avtomobilni mahalla hududida yuqori tezlikda boshqargani uchun ma’muriy javobgarlikka tortildi.
Ijtimoiy tarmoqlarda tarqalgan videoda Cobalt rusumli avtomobil tor mahalla ko‘chasida yuqori tezlikda harakatlanayotgani aks etgan. Kadrlardan transport vositasi tezligi taxminan 130 km/soatga yetgani ko‘rinadi. Mazkur hududning har ikki tomonida turar joylar joylashgan bo‘lib, bu holat boshqa yo‘l harakati ishtirokchilari va aholi xavfsizligiga jiddiy tahdid tug‘dirgan.
Samarqand viloyati Yo‘l harakati xavfsizligi boshqarmasi ma’lumotiga ko‘ra, qoidabuzarni aniqlash qiyinchilik tug‘dirmagan. Sababi, ushbu holat aks etgan videotasvirlar uning tanishlari tomonidan ijtimoiy tarmoqlardagi sahifalarga joylashtirilgan.
O‘tkazilgan tekshiruv davomida avtomobilni boshqargan shaxsning haydovchilik guvohnomasiga ega emasligi aniqlangan.
Mazkur holat yuzasidan unga nisbatan Ma’muriy javobgarlik to‘g‘risidagi kodeksning 135-moddasi (haydovchilik huquqini tasdiqlovchi hujjatlarsiz transport vositasini boshqarish) hamda 128-3-moddasi (belgilangan tezlikni oshirish) asosida ma’muriy bayonnomalar rasmiylashtirilgan.
