Janubiy Koreya sobiq prezidenti uchun o‘lim jazosi so‘raldi

 

Janubiy Koreya maxsus prokuraturasi sobiq prezident Yun Sok Yolga nisbatan qo‘zg‘olon ayblovi bo‘yicha ko‘rilayotgan apellyatsiya ishida yana o‘lim jazosini talab qildi.

 

Yonhap xabariga ko‘ra, maxsus prokuror boshchiligidagi tergov guruhi Seul Oliy sudiga tegishli iltimosnomani taqdim etgan.

 

Prokuratura avvalgi instansiya tomonidan chiqarilgan umrbod qamoq jazosi sodir etilgan jinoyat og‘irligiga mos emasligini ta’kidlab, suddan eng og‘ir jazoni qo‘llashni so‘ramoqda. Shuningdek, ular quyi sud tomonidan harbiy holat joriy etishga tayyorgarlik bo‘yicha muhim dalillardan biri sifatida baholangan sobiq harbiy xizmatchi No Sang-vonning yozuvlari rad etilganiga ham e’tiroz bildirgan.

 

Eslatib o‘tamiz, 2024-yil 3-dekabr kuni Yun Sok Yol Shimoliy Koreyadan kelayotgan tahdidni asos qilib, mamlakatda harbiy holat e’lon qilgan edi. Biroq uning murojaatidan taxminan 150 daqiqa o‘tib, Milliy assambleya harbiy holatni bekor qilish uchun ovoz bergan. Oradan ko‘p o‘tmay sobiq prezident hibsga olingan.

 

2026-yil fevral oyida sud Yun Sok Yolni parlament hududiga harbiylarni yuborish orqali Milliy assambleya faoliyatiga noqonuniy aralashishga uringan, deb topib, uni umrbod ozodlikdan mahrum etish jazosiga hukm qilgan edi. Endilikda mazkur ish apellyatsiya instansiyasida ko‘rib chiqilmoqda.