O‘zbekistonda “Yashirin iqtisodiyot xaritasi” platformasi ishga tushirilmoqda
Platforma iqtisodiyotning 22 ta asosiy tarmog‘i, 85 ta soha, 14 ta hudud hamda 208 ta tuman va shahar kesimida yashirin aylanmalar xavfini aniqlaydi.
O‘zbekistonda yashirin iqtisodiyot xavfi va ehtimoliy budjet yo‘qotishlarini tahlil qiluvchi "Yashirin iqtisodiyot xaritasi" platformasi bosqichma-bosqich to‘liq ishga tushiriladi. Bu haqda Prezident Shavkat Mirziyoyev ishtirokida o‘tkazilgan taqdimotda ma’lum qilindi.
Qayd etilishicha, Bosh prokuratura tomonidan ishlab chiqilgan platforma hozirda sinov rejimida ishlamoqda. U iqtisodiyotning 22 ta asosiy tarmog‘i, 85 ta soha, 14 ta hudud hamda 208 ta tuman va shahar kesimida yashirin aylanmalar xavfini aniqlash imkonini beradi.
Platformaga 16 ta vazirlik va idoraning axborot bazalari o‘zaro integratsiya qilingan. Ma’lumotlar real vaqt rejimida qayta ishlanib, hudud va tarmoqlar xavf darajasiga qarab "yashil", "sariq" va "qizil" toifalarga ajratiladi. Shuningdek, litsenziyasiz faoliyat yuritish, haqiqiy aylanmani yoki ish haqi jamg‘armasini yashirish kabi holatlar avtomatik aniqlanishi ko‘zda tutilgan.
Taqdimotda platformani yanada rivojlantirish bo‘yicha ham vazifalar belgilandi. Xususan, 1-oktabrgacha unga yana 70 dan ortiq axborot tizimini ulash, 2027-yil 1-yanvargacha esa barcha hudud va sohalarni platforma bilan qamrab olib, uni to‘liq ishga tushirish topshirildi.
Shuningdek, taqdimot davomida so‘nggi ikki yil ichida O‘zbekistonda kuzatilmaydigan iqtisodiyot ulushi 35 foizdan 23 foizgacha kamaygani qayd etildi.
Mamlakatda 2030-yilgacha yashirin iqtisodiyot hajmini ikki barobar qisqartirish, rasmiy bandlikni 14 million nafarga, naqdsiz to‘lovlar ulushini esa 75 foizga yetkazish maqsad qilingan.
